«Gogo Курьер» хаһаайына – саха уола

Дмитрий Баишев уонна кини бииргэ төрөөбүт убайа Егор  биир үтүө күн дьиэлэригэр олорон пицца сакаастаан абыранаары сыалай 2,5 чаас кэтэспиттэр! Ама даҕаны, киин куораттаратан тэйиччи олордорбут 2, 5 чаас диэн наһаа сүрдээх дии! Уолаттар сыта-тура толкуйдуу түһэн бараннар, рестораннартан, кафелартан сакааһы сыыдамнык тиэрдэр өҥөнү тэрийэр санааламмыттар.

Дьиэҕэ илдьэн биэрии өҥөтүн оҥорор «Gogo Курьер»  IT-бырайыак төрүттээччитэ, бэйэлээх бэйэбит сахабыт уола Дмитрий Баишев эбит.

Ыспараапка:

Дмитрий Баишев, 31 саастаах, кэргэннээх. Мэҥэ Хаҥалас Тумулуттан төрүттээх. Үөрэҕэ – филолог, нуучча-саха тылын стилистикатын специалиһа.  Предпринимательствоҕа уопута: 9 сыл.

ТУОХТАН САҔАЛАММЫТАЙ

Бырааттыы дьон олохтоох ырыынагы үөрэтэн, ырытан көрбүттэр. Курьер идэтэ киин куоракка саамай наадалаах буолар эбит. Сулууспалаах предприниматэллэр куруук курьер көрдөөн тахсаллар. Саамай сүрүнэ, массыынаны ыытар уонна аһы-үөлү таһар буолда да бүттэҕэ дии.  Маны билэн баран, бырааттыылар курьердар өҥөлөрүн агрегаторын оҥорор санааланаллар. Ол саҕана аатырбыт «Яндекс.Еда», «Delivery Club» сыттара да суоҕа.

АЙТИШНИК БУОЛАРГА ТЕХНИЧЭСКЭЙ ИДЭ НААДАТА СУОХ ЭБИТ

– Кылгастык кэпсээтэххэ, 2011 с. бүгүҥҥэ диэри предпринимательство араас хайысхатынан үлэлээтим. Түһүүлээх-тахсыылаах, мүччүргэннээх предприниматель олоҕун наhаа да толору буолбатар, эппинэн-хааммынан син билэ сатаатым  диэххэ сөп.

IT-га киирэргэ хайаан да техничэскэй үөрэх наада диэн буолбатах эбит. Кэтээн көрдөххө, хамаанда салайааччылара үгүстэрэ программист буолбатахтар.

«Gogo Курьер»  үлэтин былырыын муус устарга Дьокуускай куораттан саҕалаабыта. Идиэйэни, киhи соhуйуох, физкультура учуутала  идэлээх бииргэ төрөөбүт убайбынаан Егордуун толкуйдаабыппыт.

ИНВЕСТИЦИЯ

– Бачча улахан бырайыак үбүлээһинэ суох кыаллыбата буолуо дии.

– Инвестицията суох ханнык да бырайыак хамсаабат. Бастакы харчыга бэйэм киэнэ тиийбэт буолан, эбии доҕотторбун кыттыһыннарбытым. Аҥаардас тылбар итэҕэйэн, “эн сатабыллааххын, бырайыагыҥ хайаан да табыллыа, сатаныаҕа” диэн алҕаан туран, харчы биэрбиттэр. Түргэн үлүгэрдик хамсанан аҕыйах кэм иһигэр “старт” биллэрбиппит. Доҕотторум өйөөн, бастакы 1 мөл. солк. инвестициялаабыттара.

Ол кэннэ бастакы хардыылары оҥорон  иһэн, “Якутия” технопарк IT-киинин резиденэ буолбуппут. Тута “B8” диэн акселератор куонкуруhун бэрт таhымнаахтык ааһан, акселераторга киирбиппит. Түмүгэр өрөспүүбүлүкэбит инновациятын сайыннарар пуондаттан  2 мөл. солкуобай кэриҥэ үбүлээһин ылбыппыт.

ТУТА ХАРЧЫЛАҺАН БАРАҔЫН

– Бырайыак туһунан сиһилии кэпсиир эбит буоллахпына, «Gogo Курьер” диэн курьердар агрегатордара. Ол аата ханнык баҕарар киһи, мобильнай сыһыарыы хачайдаата да, курьер буолан харчыласпытынан киирэн барыан сөп. Ханнык да үлэҕэ ирдэбил быһыытынан бэрэбиэркэ, тэттик үөрэтии син биир баар.

Сүнньүнэн, таһар таһаҕаспыт бородуукта, түргэнник буһар астар, сибэкки, массыына саппаас чааһа, докумуон, кинигэ уо.д.а. буолар.

Бырайыак идиэйэтэ үс сүрүн тирэхтээх:

• Дьону үлэлээх-дьарыктаах оҥоруу.
• Доставка кэтэһиннэрэр бириэмэтин кылгатыы (биһиги куоракка үлэлиэхпититтэн 2,5 чаас кэтэһииттэн 45 мүн. диэри кылгаата)
• Орто уонна дьоҕус бизнес сайдарыгар төһүү күүс буолуу. Бизнес бэйэтин курьерын хамнаска тутара ночооттоох – хамнаһа, үлэһит ыалдьара, массыыната алдьанара...  Оттон “Gogo Курьер” киниэхэ хас биирдии сакааһыгар анаан тус-туспа курьеры ыытыан сөп.

Билигин Дьокуускайга 190-тан тахса  биһиги сыһыарыыбытын туһанар тэрилтэлээхпит.

АБЫРАЛЛААХ КУРЬЕРДАР

– Бу аҕыйах хонуктааҕыта сыһыарыыбытын саҥардан биэрдибит. Онон күндү ааҕааччыбыт, PlayMarket, эбэтэр AppStore киирэн “Gogo Курьер” диэни хачайдаат туттан саҕалыаххын сөп.

Билиҥҥи ыарыы-дьаҥ кэмигэр төттөрү-таары айаннаабакка, тугу эмит ыытардаах буоллаххытына (күлүүс, докумуон, сибэкки уо.д.а) тугу эмит ылларар наада буоллаҕына (эмп-томп, ас-үөл уо.д.а) биһиги курьердарбыт абырыахтара. Курьердарбыт бары харыстанар  мааскалаахтар, бэрчээккэлээхтэр, анал сумкалаахтар.

БЫРАЙЫАК БАРЫЫҺА

– Биһиги аҥаардас барыс эрэ иһин үлэлээбэппит. Биһиэхэ сүрүн сыалбыт. бастатан туран, дьоҥҥо туһалааҕы айыы-тутуу, олоҕу тупсарыы. Дьэ, ол эрэ кэннэ барыс кэлэр. Тоҕо диэтэххэ, дьоҥҥо туһалаах бырайыак хайаан да сайдар кэскиллээх. Була сатаан оҥоһуллубут, үтүгүннэрэн оҥоһуллубут бырайыактар элбэх харчы угуута суох “умайаллар».

МИЛЛИОНЕР

– Бырайыак бастаан утаа, экспертэр сыаналарынан, 40 мөл. солкуобай сыаналаах этэ. Билигин өссө ыараабыта буолуо. Дьиҥнээх харчы киллэрэрэ күн-түүн, биллэрин курдук, улаатан иһэр, сайдыы баар.

АТЫТТАРЫ КЫТТА УҤА-ХАҤАС БЫРАХСАБЫТ

– «Яндекс.Еда», «Delivery Club» диэн Арассыыйа саамай бөдөҥ хампаанньалара. Кинилэр сүрүннээн киин эрэ куораттарга күүскэ үлэлииллэр. Мин хампааанньам кинилэри кытта атын куораттарга тэҥҥэ уҥа-хаҥас бырахсар кыахтанна. Ардыгар, кыайар да курдукпут. Манна даҕатан эттэххэ, технологиябыт кинилэртэн туох да уратыта суох. Систиэмэлэрбит эрэ атыттар.

Билигин Дьокуускайга,  Южно-Сахалинскайга, Кызылга, Сургутка, Казахстан Актау куоратыгар үлэлии сылдьабыт. Ону таһынан, Владивосток, Хабаровск, Благовещенск куораттарга тахсаары бэлэмнэнэбит.

Ааппыт омуктуу-нууччалыы буолан саха тэрилтэтэ диэн билбэттэр, хантан эрэ соҕурууттан эбэтэр арҕааттан кэлбит дии саныыллар.

САХАЛАРГА ДА БААЛЛАР ЭБЭЭТ

– Бары билэрбит курдук, бырааттыы Алексей уонна Афанасий  Ушницкайдар «МАЙТОНА», Арсен  Томскайы “inDriver” тэрилтэлэрэ аан дойдуга тахсан арҕаа дойдулар бастыҥнарын кэккэлэригэр турдулар. Ону тэҥэ, мин билэрбинэн, IT-киин резиденин бырайыага Fаntastic диэн эмиэ бэккэ тахсан эрэр. Бу үс холобур оҥостор тэрилтэбит буолар. Биһиги ити ааттаабыт бырайыактары кытта биир кэридиискэ турардыы үлэлии-хамсыы сылдьабыт.

Дьинэ, IT-паарка иһигэр араас стартап барыта баар, сүүстэн тахса резиденнээх олорор.  Бары даҕаны, күүстээх үбүлээһин баар буоллаҕына, аан дойдуга киэҥник тахсар идиэйэлэр. Саха өрөспүүбүлүкэтэ төһө кыайарынан тустаах усулуобуйаны оҥорор. Аны чааһынай бизнес, судаарыстыбаннай хампаанньалар кыттыһан, инвестициялаан көмөлөһөллөрө буоллар, сайдыыбыт тургэтиэ этэ.

КИМИЭХЭ ТЭҤНЭҺИЭХХЭ НААДАНЫЙ ?

– Стив Джобс, Билл Гейтс, Илон Маск курдук дьоҥҥо тэҥнэһиэххэ наада диэхпин, дьиҥэр аттыбытыгар хаама сылдьар холобур буолар дьон элбэх ээ. Мин биирдэстэринэн Николай Александрович Находкины этиэм этэ. Бу киһи соторутааҕыта тымныыттан электричество уота ылар аппарат оҥорбут этэ.

КОРОНА-КИРИИСИС САБЫДЫАЛА

– Covid-19 бириэмэтигэр син биир айгырааһын баар. Хайдах да буоллун, Арассыыйа экономиката биир. Бу кэлэр сылларга өссө мөлтүө диэн сабаҕалыыбын.

Бу иэдээн кэмигэр медиктэргэ барыларыгар наадалаах көмөнү судаарыстыба  оҥоруохтаах. Биһиги бэйэбит хайысхабытынан курьердарбытын комиссионнай төлөбүрдэриттэн  босхолоон, уопсайа 200000 солк. көмөлөспүппүт. Биирдиилээн кырдьаҕас дьону эминэн, аһынан хааччыйдыбыт. Ол эрэн көмө диэн көмө, хампаанньабыт ис политикатын тутуһан баччаны көмөлөстүбүт диэн кэпсээн оҥостубаппыт.

– Дмитрий, кэпсэтиибит иһин махтанабын! Чөл туруктаах олоҕу, таһаарыылах үлэни.

-Махтал!

***

Ити курдук, саха ыччата харса суох Арассыыйа киэҥ ырыынагар тахсар. Кэнники кэмҥэ киин куораппытыгар «Gogo Курьер» үлэлиир буолан, ас-таҥас сакаастааһына быдан түргэнник оҥоһуллар буолла.