Герой-оҕолор наҕараадаланнылар

Биэс оҕоттон үһэ мэтээллэринэн наҕараадаланнылар, итини сэргэ герой-оҕолорго махтал суруктары туттардылар.

«Хорсун быһыы иһин» РФ Судаарыстыбаннай мунньаҕын өйдөбүнньүк мэтээлинэн, ЫБММ регионнааҕы управлениетын, «Арассыыйа ийэлэрэ» Бүтүн Арассыыйатааҕы уопсастыбаннай хамсааһын, өрөспүүбүлүкэ Бырабыыталыстыбатын бэрэссэдээтэлин бастакы солбуйааччы Дмитрий Садовников махтал суруктарынан уонна «Эдэр быыһааччы» значогунан Кэбээйи улууһуттан Аниврин Алексеев, Сергей Кузнецов уонна Томпо улууһуттан Василий Степанов наҕараадаланнылар.

2022 сыл от ыйын 8 күнүн түүнүгэр, Сэбээн Күөл сэлиэнньэтигэр күүстээх ардах түмүгэр, дьиэлэр тиэргэннэрэ уонна социальнай эбийиэктэр ууга барбыттар. Аниврин уонна Сергей хорсун быһыыны көрдөрөн, баҕа өттүнэн ууга барбыт дьиэлэртэн олохтоохтору көһөрөргө көмөлөспүттэр.

Василий Степанов, Кириэс Халдьаайы сэлиэнньэтигэр, массыына өрөмүөннүү сылдьан домкрата хамсаан баттаппыт биир дойдулааҕын быыһаабыт.

Махтал суруктарынан уонна «Эдэр быыһааччы» значогунан Бүлүү улууһуттан Николай Максимов уонна Афанасий Копырин наҕараадаланнылар. Оҕолор Уһун сэлиэнньэтигэр баар Култуура киинигэр эбии дьарыкка баран испиттэр. Кинилэр бииргэ үөрэнэр уоллара тымныыттан астматын тииһигэ киирэн, тыына хаайтаран охтон түспүт, саатар ингалятора суох сылдьыбыт. Оҕолор уолуйбатахтар, биир уол көмө көрдүү сүүрбүт, иккиһэ – охтубут оҕо түөһүн массаастаабыт. Кэнники быраас эппитинэн, кэмигэр оҥоһуллубут массаас оҕо олоҕун быыһаабыт.

Хорсун оҕолору Арассыыйа ЫБММ регионнааҕы Кылаабынай управлениетын начаалынньыгын солбуйааччы Виталий Немцов эҕэрдэлээтэ уонна төрөппүттэригэр махталын биллэрдэ, барыларыгар үтүө доруобуйаны, этэҥҥэ буолууну баҕарда.