«Георгиевскай лиэнтэ» аахсыйа саҕаланна

Бүгүҥҥүттэн СӨ Ыччат дьыалаларыгар уонна социальнай коммуникацияларга министиэристибэтэ Кыайыы волонтердарын кытта «Георгиевскай лиэнтэ» аахсыйаны саҕалаата. 
Кыайыы волонтердара Георгиевскай лиэнтэлэри куорат олохтоохторугар түҥэтэллэр. Онон ким баҕалаах атыы-эргиэн кииннэриттэн, улахан маҕаһыыннартан уонна АЗС туочукаларыттан босхо ылыахтарын сөп. 

Сиһилии волонтердар официальнай аккауннарыгар киирэн эбэтэр «Кыайыы волонтердара» хамсааһын салайааччыта Алгыс Петровтан  ыйытыаххытын сөп. Төл. +7 924 868-04-72.

Аахсыйа сүрүн сыала – Аҕа дойду Улуу сэриитигэр олохторун, сырдык тыыннарын толук уурбут ытык дьоммутун ахтан-санаан ааһыы, кинилэр хорсун быһыыларыгар сүгүрүйүү, өйдүүрбүтүн-саныырбытын, кинилэринэн киэн туттарбытын биллэрии. 
Историяны санаан ааһар буоллахха, Сибэтиэй Георгий уордьанын 1769  сыл сэтинньи 26 күнүгэр (ахсынньы 7 күнүгэр) Екатерина II императрица олохтообут. Ити кэмтэн саҕалаан уордьанынан Нуучча Аармыйатын чулуу офицердарын наҕараадалыыллар этэ. 
Аҕа дойду Улуу сэриитин сылларыгар үтүө үгэстэри салҕаан, 1943 сыл сэтинньи 8 күнүгэр Албан Аат үс истиэпэннээх уордьана олохтоммута. 

1992 сыл кулун тутар 2 күнүнээҕи Арассыыйа Үрдүкү Сэбиэтин Президиумун Ыйааҕынан Сибэтиэй Георгий уордьана уонна «Георгиевскай кириэс» сөргүтүллүбүттэрэ. 
Онтон 2005 сыллаахха, Улуу Кыайыы 60 сылыгар, «Георгиевскай лиэнтэ» аахсыйа кыттыылаахтара Арассыыйа куораттарын уулуссаларыгар өйдөбүнньүк бэлиэтин иилинэн тахсыбыттара. Бастаан «Биһиги Кыайыыбыт» интириниэт-бырайыак чэрчитинэн былааннаммыт тэрээһин сылын аайы ыытыллар үтүө үгэскэ кубулуйда.