Гагаринскай уокурук куорат дьаһалтатын үлэтин үчүгэйинэн сыаналаата

Ааспыт 2022 сылга киин куорат Гагаринскай уокуругар бөдөҥ социальнай объектартан «Северная сказка» оҕо саада, бассейннаах уонна катоктаах физкультурнай-чэбдигирдэр комплекс үлэҕэ киирбиттэрэ, поликлиника, 38 №-дээх оскуолаҕа салҕааһын, Кузьмин уул., 24/1 элбэх кыбартыыралаах олорор дьэ тутуулара саҕаламмыта.

Сүҥкэн болҕомто уокурук уулусса-суол ситимигэр ууруллубута. Ол курдук, «Куттала суох, хаачыстыбалаах суоллар» национальнай бырайыак иитинэн Авиатордар уулуссалара өрөмүөннэммитэ. Маны сэргэ киин куоракка ыытылла турар Тупсарыы сылларынан 15 тиэргэҥҥэ тупсаран оҥоруу үлэтэ ыытыллыбыта: Кузьмин уул., 26/3, 28/3, 29, 29/1, 29/2, 30/2, 30/3, 34, 34/1, Можайскай уул., 19, 19/1, 21, 21/1, 17/5, 17/6. Элбэх кыбартыыралаах олорор дьиэлэр тиэргэннэрин аспааллааһын, тротуар тэлгэтии, эрэһээҥкилэри туруоруу, ардах-хаар уута сүүрэрин хааччыйар үлэлэр былааннаахтык барда. Можайскай уулуссатын 2/3, 23/2 туруоруллубут дьоҕус архитектурнай оҥоһуктар (МАФ), Можайскай уул., 13 турар «Стерх» спорт комплексын таһыгар тутуллубут спорт балаһаакката олохтоохтор сэҥээриилэрин ыллылар. Уокурук киэн туттуута – Кыайыы пааркатыгар «Патриот» аллея оҥоһулунна, Сибэтиэйдэр храмнарын тутуу салҕанар.

«Сырдык столица» муниципальнай бырагырааманан Христофор Максимов уулуссатыгар 1,6 км усталаах уот ситимэ тардылынна, маныаха 50 тирээбил уонна 50 лаампа туруорулунна. Эмиэ бу бырагырааманан Газомагистральнай уулуссаҕа 8 тирээбили кытта 32 лаампа уурулунна.

Хаарбах дьиэттэн көһөрүү өрөспүүбүлүкэтээҕи бырагырааматынан 21 кыбартыыраттан 71 киһи саҥа дьиэҕэ көстө, Өктөөп 50 сыла уул., 16 турбут хаарбах туруктаах дьиэ көтүрүлүннэ.

Бу курдук былааннаах, далааһыннаах үлэ ыытыллан, Гагаринскай уокурук олохтоохторо Олохтоох дьаһалта ааспыт 2022 сыллааҕы үлэтин үчүгэйинэн сыаналаатылар. Отчуот кэмигэр киирбит этиилэр, туруорсуулар боротокуол быһыытынан салгыы үөрэтиллиэхтэрэ, быһаарыы тахсыаҕа.

Санатар буоллахха, бу нэдиэҕэ нэһилиэнньэ иннигэр отчуоттар бэҕэһээ буолан ааспыт Тулагы Киллэм нэһилиэгин сэргэ Губинскай уокурукка (тохсунньу 18 күнэ), тутуу уонна тырааныспар эйгэтигэр (тохсунньу 19 күнэ), Хатас нэһилиэгэр (тохсунньу 19 күнэ), «Водоканал” ААУо (тохсунньу 20 күнэ), Табаҕа  нэһилиэгэр (тохсунньу 21 күнэ), Промышленнай уокурукка (тохсунньу 21 күнэ) итиэннэ Строительнай уокурукка (тохсунньу 21 күнэ) буолуохтара.

Көхтөөх кыттыыны ылыҥ, олорор түөлбэҕит тупсарын туһугар сыыһаны-халтыны ыйыҥ, этиилэрдэ киллэриҥ, санааҕытын этиҥ.