Гагарин уокуругун олохтоохторо гырааны сүүйдүлэр

Гагарин уокуругун «Мега» Атыы-Эргиэн Киинин кэннигэр турар чааһынай дьиэлэрин олохтоохторо бэйэни салайыныы территориальнай уоргана буолан, сомо5олоһон икки гырааны сүүйдүлэр. Сүүйбүт харчыларынан сайыҥҥы уу ситимин тардыбыттар уонна уулусса сырдатыытын оҥороллор. «Герои ВОВ» бэйэни салайыныы территориальнай уорганын быһыытынан билиҥҥитэ киин куоракка соҕотох. 
Уокурук Тихонов, Миронов, Стрекаловскай уулуссаларын олохтоохторо быйыл муус устар ыйга «Герои ВОВ» бэйэни салайыныы территориальнай уорганын тэрийэн, куорат дьаһалтатын уулусса сырдатыытын киллэриигэ үс мөл. суумалаах гыраанын сүүйбүттэр. Дьоҕус оройуонтан оптуобус тохтобулугар диэри 20-чэ мүнүүтэ хаамыллар, онон олохтоохторго уулусса сырдатыыта тыын суолталаах боппуруос.  
Бэйэни салайыныы уорганын бэрэссэдээтэлэ Алексей Андросов эппитинэн, бэдэрээччик "Горсвет" "Якутскэнерго" тирээбиллэригэр лаампалары ыйыаҕа, ахсынньы ый бүтүөр диэри үлэ оҥоһуллуохтаах. 
Иккис гыраан – уу ситимин тардыыга туһуламмыт. Ити 800 тыһыынча солкуобай суумалаах куорат баһылыгын гыраана. Билиҥҥи туругунан ситими 97 тиэргэн территориятыгар тардыбыттар. Кэлэр сылга дьоҕус оройуон сороҕо сайыҥҥы уу ситиминэн хааччыллыаҕа. Манна 121 чааһынай дьиэ баар, 500 киһи олорор.
Бэйэни салайыныы территориальнай уоргана «Герои ВОВ» ааты мээнэҕэ талбатах. Дьоҕус оройуон икки уулуссата Аҕа дойду Улуу сэриитин геройдара – Үөһээ Бүлүү оройуонуттан төрүттээх снайпер Алексей Миронов уонна Уус-Алдан улууһуттан төрүттээх, 1996 сыллаахха РФ Героя үрдүк аатынан наҕараадаламмыт Михаил Стрекаловскай ааттарын сүгэллэр.