Гагарин уокуругар саҥа уһуйаан аһылынна

Саҥа дьиэ үөрүүлээх аһыллыыта үгэс быһыытынан алгыстан саҕаланна. Ити кэннэ ыалдьыттарга анаан экскурсия тэрилиннэ. Уһуйааҥҥа  хореография, муусука уонна физкультура саалалара, дьаарбайар веранда, педагог-психолог, логопед-учуутал кэбиниэттэрэ уонна  робототиэхиньикэнэн дьарыктанар хос бааллар. Тэрилтэ бары өттүнэн толору хааччыллыбыт – хас биирдии бөлөххө интерактивнай дуоска, тэлэбиисэр, көмпүүтэр уонна өҥнөөх принтер тураллар.

Ил Дархан оҕо уһуйаанын кэлэктиибин саҥа дьиэҕэ көспүттэринэн эҕэрдэлээтэ.

«Дьокуускайга сылын аайы саҥа оскуолалар уонна оҕо уһуйааннара тутуллан үлэҕэ киирэллэр. Биһиги салгыы өрөспүүбүлүкэ үрдүнэн үөрэҕирии эбийиэктэрэ тутуллалларын өйүөхпүт. Быйыл 15 оскуоланы, 6 оҕо уһуйаанын тутары былаанныыбыт. Дьокуускайга сыл ахсын оҕо ахсаана элбиир, быйыл сэттэ тыһыынчаттан тахса куорат оҕото оскуола боруогун аан бастаан атыллаата. Ити улахан дьол буолар. Оҕолорбут уһуйаантан саҕалаан хаачыстабалаах үөрэҕи ылыахтаахтар», – диэтэ Айсен Николаев.

Куорат баһылыга Евгений Григорьев уокурук олохтоохторун үөрүүлээх түгэнинэн эҕэрдэлээтэ.

«Гагарин уокуруга балысханнык сайдар, бу куорат саамай элбэх нэһилиэнньэлээх уокуруктарыттан биирдэстэрэ. 2032 сылга диэри оҕо уһуйааннарын иитиллээччилэригэр 5 тыһыынча саҥа миэстэни таһаарыахтаахпыт. Ити үлэбит сүрүн хайысхата буолар», - диэн бэлиэтээтэ Евгений Григорьев.

Уһуйаан тиэргэнигэр 12 оонньуур балаһааккка оҥоһуллубут. Бары навестаахтар, кумахтаах уо.д.а. оонньуур сирдээхтэр. Итиэннэ спортивнай балаһаакка уонна парковка бааллар. Сэбиэдиссэй Нюргустана Мордовская иһитиннэрбитинэн, саҥа уһуйаан 2-7 саастаах 280 оҕону ылар, 12 бөлөх баар буолар, итинтэн биэһэ – саха тыллаах.

«Демография» национальнай бырайыак чэрчитинэн тутуллубут үс этээстээх дьиэ уопсай иэнэ 3 тыһыынча кв. м. тахса,  тутуу уопсай суумата – 243,9 мөлүйүөн солкуобай, итинтэн 132,9 мөлүйүөн солкуобайа – федеральнай, 110,9 мөлүйүөн солкуобайа – өрөспүүбүлүкэ бүддьүөттэриттэн.