Гааска көһөр дьоҥҥо 90 % чэпчэтии

Саха сирэ тимир көлөнү гааска көһөрөр дьоҥҥо субсидия биэрэр буолла. СӨ баһылыгын уонна Бырабыыталыстыбатын пресс-сулууспата иһитиннэрэринэн, бензинтэн гааска көһүү ороскуота 90 % чэпчээтэ.
Маныаха өрөспүүбүлүкэ бүддьүөтүттэн 24 мөл. солк. көрүлүннэ. Маны таһынан газомоторнай уматыгынан айанныыр суоппардарга тырааныспар нолуогар 50 % чэпчэтии көрүллэр. 
2030 сылга диэри Саха сиригэр гааһынан саппараапкалыыр 40-ча станция тутуллаллара былааннанар. Итиэннэ регионнааҕы массыына уматыгын уларытар кыахтаах авторизированнай кииннэргэ ороскуоттарыгар субсидия көрүллэр, оттон сир куортамыгар уонна нолуокка кэккэ чэпчэтиилэр киирэллэр. Сотору авторизированнай кииннэргэ аккредитациялааһын саҕаланыаҕа.
Манна КПГ (компримированный природный газ) уонна СПГ (сжиженный природный газ) туһунан этиллэр. Уматык бу көрүҥнэрэ экология өттүнэн ыраастарынан уонна сыаналара чэпчэкитинэн хайҕаналлар. Холобур, Арассыыйа үрдүнэн айылҕа гааһын сыаната ортотунан 20 солк. буолар.