Дьокуускай фонтаннарыгар сөтүөлүүр оҕо сайын аайы элбээн иһэр. Холобур, Ленин болуоссатыгар оҕолор оҥостон кэлэн сөтүөлүүллэр – таапыскалаах, соттордоох! Кырачааннары улахан дьон  арыаллыыллар, обургулар бэйэлэрэ сылдьаллар. Кэтэ сылдьар таҥастарынан ууга киирэн чалбааттанар оҕо кытта элбэх.

Болуоссаттарага тымныы смузи, мороженай атыыта сыллата тэриллэр. Атыы бу көрүҥэ пандемия да кэмигэр хото тэриллэр эбит. Атыыһыттар мааската суохтар, уочаракка дистанция тутуһуллубат, антисептик көрүнньэҥ эрэ буолар турар...

Орджоникидзе фонтаныгар тэпсээччи, умсааччы элбэх. Умайар уоттаах шариктар, оонньуурдар атыылара баар.

Роспотребнадзор специалистара фонтаҥҥа сөтүө буортутун туһунан:

–  Фонтаннар – куораты тупсарар тутуулар ахсааннарыгар киирэр объектар.  Салгыны сиигирдэргэ, турар сирин көстүүтүн тупсарарга ананаллар.

Үгүс фонтан уу баһыллар сирдээх буолар. Фонтаҥҥа сөтүөлүүр киһи доруобуйатыгар куттааллаах.

Фонтан уута элбэхтик саҥардыллыбат, ыраастаммат. Санитарнай өттүнэн  ылан көрдөххө, фонтан уутугар, сөтүө уутун курдук араас сүһүрдэр эттиктэртэн ыраастыыр ирдэбил туруоруллубат. Халлаан сылаас кэмигэр уу түргэнник киртийэр, сүһүрэр.

Фонтаҥҥа сөтүөлээһин тымныйыыга тиэрдиэн сөбүн таһынан, ис сүһүрүүтүгэр, тыынар уорганнар ыарыыларыгар, конъюктивикка, энтеровируснай, ротавируснай инфекцияларга тиэрдиэн, гепатит А-ҕа тиийэ хабыахха сөп.

Маны таһынан фонтан киһи сөтүөлүүрүгэр анамматах тутуу буолан халтархай, онон охтон эчэйиини дэбигэстик ылыахха сөп. Фонтан үксэ электричествоҕа холбонор – ол эмиэ сэрэхтээх.

Улахан дьон уонна оҕолор фонтан куйаастан сөтүөлээн быыһанар сир буолбатаҕын өйдүөхтээхтэр.