Физкултуурунай хамсааһын 100 сылын чэрчитинэн А.К. Софронов 95 сааһа бэлиэтэннэ

Саха сиригэр физкултуурунай хамсааһын тэриллибитэ 100 сылын чэрчитинэн Чурапчыны “спорт туоната” дэппит Саха АССР култууратын үтүөлээх үлэһитэ, ССРС физическэй култууратын туйгуна, “Урожай” физкультурнай-спортивнай уопсастыба бочуоттаах чилиэнэ, физкултуура уонна спорт төлөннөөх пропагандиһа, уһулуччулаах салайааччыта уонна тэрийээччитэ Афанасий Кирикович Софронов 95 сылын биир дойдулаахтара чурапчылар тохсунньу 24 күнүгэр үөрүүлээх быһыыга-майгыга бэлиэтээтилэр. Хас биирдии спорт бэтэрээнэ физкултуурунай хамсааһын 100, А.К. Софронов 95 сылларын кэрэһилиир үбүлүөйдээх мэтээлинэн бэлиэтэммитэ кэрэхсэбиллээх буолла.

Таһырдьа 54 кыраадыстаах хойуу туманнаах тымныыттан чаҕыйбакка, спорт бэтэрээннэрэ Амматтан, Дьокуускайтан тиийэ кэллилэр. “Боотур Уус” стадиоҥҥа киириигэ туруоруллубут пааматынньыкка сибэкки дьөрбөтүн ууруу сиэрэ-туома ыытылынна. Улуус баһылыга Степан Саргыдаев үбүлүөйдэр суолталарын, Афанасий Кирикович Софронов улуу тренер Д.П.  Коркинныын иккиэн санааларын холбоон, бэйэлэрин тула киэҥ актыыбы, уопсастыбаннаһы түмэн, киэҥ далааһыннаах хамсааһыны таһаарбыттарын тоһоҕолоон бэлиэтээбитин мустубут дьон болҕойон иһиттилэр.

А.И. Федотов аатынан спорт комплексын саалатыгар нэһилиэктэр икки ардыларыгар сыл устата ыытыллыахтаах улуус Комплекснай спартакиадата хапсаҕай күрэхтэһиитинэн саҕаланна. Улуус баһылыга Степан Саргыдаев, Ил Түмэн физическэй култуураҕа уонна спорка сис кэмитиэтин бэрэссэдээтэлэ Михаил Гуляев, Саха Өрөспүүбүлүкэтин “Барҕарыы” пуондатын салайааччыта Альбина Поисеева эҕэрдэлэрин тиэртилэр. Нэһилиэктэр баһылыктара хамаандаларын салайан аҕаланнар, бэйэлэринэн кыттан, икки көбүөрүнэн тыастаахтык бырахсан, сытыы хапсыһыылар буоллулар. Уон биэс кыра уонна улахан нэһилиэктэр тоҕустуу хапсаҕайдьыттара утарыта тахсан киирсибиттэригэр кыра нэһилиэктэргэ Хайахсыт, Хадаар, Арыылаах, улахан нэһилиэктэргэ Чурапчы, Хоптоҕо, Хатылы бастааннар уонна туһааннааҕынан иккис-үһүс миэстэлэргэ тиксэннэр, Кубоктарынан наҕараадаланнылар.

“Айылгы” сынньалаҥ киинигэр үбүлүөйдээх мунньаҕы улуус баһылыгын солбуйааччы Мария Кронникова салайан ыытта. Физкултуура уонна спорт киэҥ историятын хабар дириҥ ис хоһоонноох дакылаат Саха сиригэр физкултуурунай хамсааһыны өрөспүүбүлүкэ бөдөҥ салайааччылара М.К. Аммосов, П.А. Ойуунускай, И.Н. Барахов түстээбиттэрэ, Н.Д. Кривошапкин – Уот Субуруускай киэҥ хоннохтоохтук үлэлээбитэ, сир ахсын спортивнай секциялар тэриллэн, ГТО туттарыыларыгар күргүөмнээх үлэ барбыта бэлиэтэннэ.

Афанасий Кирикович Софронов эрчимнээх эдэр сааһыттан спордунан үлүһүйэн дьарыктаммытын, өрөспүүбүлүкэҕэ орто уһуннаах сиргэ сүүрүүлэргэ бастыырын, пелучилищены бүтэрбитин, Н.Н. Тарскай дьаһалынан Москваҕа үөрэммитин, өрөспүүбүлүкэҕэ “Колхозник”, “Урожай” уопсастыбалары салайбытын, онтон бэйэтин көрдөһүүтүнэн Чурапчыга спорду салайан, спортивнай секцияларга дьоҕурдаах ыччаттары анаталаан үлэлэппитин, биир-икки сыл иһигэр оройуону 19-с миэстэттэн инники күөҥҥэ таһаарбытын, спорт имбэртээрин, снарядтары булуталыырын, дойду киин куораттарынан сылдьыталыырын, дьоҕурдаах тренердэри аҕалтаан олохтоох ыччаты үөрэтиини, дьарыктааһыннары ыыттарарын, кыайыылары аҕалтыыр бастыҥ спортсменнар тахсыталаабыттарын, Саха АССР, ССРС бастакы маастардара кимнээх буолалларын дакылааччыт ааттаталаата.

Улуус баһылыга бары уон сэттэ нэһилиэккэ спорт иснтруктордара анаммыттарын, тустуу филиаллара аһыллыбыттарын, Кытаанах нэһилиэгэр хайыһар спордун сөргүтэр дьаһал бэриллибитин, физкултууранан уонна спордунан дьарыктанааччылар кэккэлэрин элбэтиигэ, оҕо спордун сайыннарыыга анал бырагыраама ылыллыбытын, өрөспүүбүлүкэ спартакиадаларыгар, Тааттаҕа 2025 с. Манчаары оонньууларыгар, Ньурбаҕа 2027 с. Саха сирин норуоттарын оонньууларыгар бастыыры, улуус Комплекснай спартакиадата А.К. Софроновка ананан ыытылларын, үлэ бастыҥ уопутун кэлэр көлүөнэҕэ тиэрдэри бэлиэтээтэ.

Спорт сайдыытыгар бөдөҥ кылааттарын киллэрбит теннисист, волейболист Виталий Неустроев; 1960-1970 сс. оройуон, өрөспүүбүлүкэ бастыҥ теннисиһэ, волейболиһа Альбина Поисеева; улуус спорка бэтэрээннэрин сэбиэтин бэрэссэдээтэлэ Герасим Платонов; А.К. Софронов сиэн балта, Амма улууһун баһылыгын солбуйааччы Ньургуйаана Илларионова; киин нэһилиэк баһылыга Владимир Сивцев, А.К. Софронов төрөөбүт-үөскээбит Одьулуунун баһылыга Людмила Ефремова; физкултуура уонна спорт историятынан утумнаахтык дьарыктанар Виктор Дьяконов;  Саха Өрөспүүбүлүкэтин спорка бэтэрээннэрин сэбиэтин бэрэссэдээтэлэ Гаврил Сивцев; физкултуура уонна спорт институтун ректора Иннокентий Готовцев; Ил Түмэн физическэй култуураҕа уонна спорка сис кэмитиэтин бэрэссэдээтэлэ Михаил Гуляев эҕэрдэ тыллары эттилэр, соруктары туруордулар.

Сахабыт сиригэр физкултуурунай хамсааһын 100 уонна физкултуура-спорт чаҕылхай салайааччыта, тэрийээччитэ Афанасий Кирикович Софронов 95 сылларыгар анаммыт дьаһаллар инникитин кэскиллээх үлэҕэ кынаттыахтара.