Филармония биир дойдулаахтарын өйүүр кэнсиэртэри тэрийэр
Кэнсиэртэртэн киирбит үп быстах байыаннай хомуурга барбыт дьону уонна кинилэр дьиэ кэргэттэрин өйүүргэ барар. Бүгүҥҥү күҥҥэ икки аһымал кэнсиэр буолбут. Алтынньы 4 күнүгэр ыытыллыбыт бастакы кэнсиэргэ Symphonica ARTica симфоническай оркестр (кылаабынай дирижер Фабио Мастранджело) патриотическай бырагырааманан кытынна.
Алтынньы 10 күнүгэр ыытыллыбыт кэнсиэри Lena River Brass духовой оркестр иилээн-саҕалаан ыытта. Кэнсиэргэ нуучча композитордарын классическай айымньылара, байыаннай марштар оонньоннулар, патриотическай ырыалар, ол иһигэр “Марш героев Донбасса” уонна Валерий Халилов “Навсегда великая страна” ырыата ылланнылар.
Үһүс кэнсиэр алтынньы 22 күнүгэр ХИФУ “Сэргэлээх уоттара” Култуура киинигэр буолуоҕа. Кэнсиэргэ филармония айар кэлэктииптэрин сэргэ Саха сирин Мусукаалынай үлэһиттэрин сойууһун артыыстара кыттыахтара.
“Кэнсиэрбитигэр көрөөччү көхтөөхтүк сылдьыаҕа диэн эрэнэбит. Улуу композитордар айымньыларыттан дьон күүс-уох ылар, стресстэрин, айманыыларын таһыма намтыыр. Сылдьыбыт киһи барыта астынан, махтанан тарҕаһар уонна маннык тэрээһиннэри тиһиктээхтик ыытарбытыгар көрдөһөр”, - диэтэ филармония дириэктэрэ.
Сонуннар
Ордук ааҕаллар
