Евгений Григорьев «Жилкомсервис» МУТ эбийиэктэрин бэрэбиэркэлээтэ

Куорат баһылыга Евгений Григорьев «Жилкомсервис» муниципальнай унитарнай тэрилтэҕэ мунньахтаата уонна улахан кээмэйдээх эбийиэктэр штрафстоянкаларын, куораттааҕы кытаанах хомунаалынай бөҕү харайар полигону уонна муниципальнай тэрилтэ баазатын көрдө. 
«Жилкомсервис» МУТ салайааччыта Дмитрий Аммосов иһитиннэрбитинэн, Окружной шоссе, 4 км, 2Б штрафстоянкаҕа инники өттүгэр туттуллубат 900 гараас баар. Куорат баһылыга территорияттан эргэ гараастары суох гыналларыгар сорудахтаабыт. 
Бөх полигонугар кытаанах хомунаалынай бөҕү ыйааһыннаан тутааһын штатнай эрэсииминэн барара бэлиэтэннэ. Улахан ньуурдаах ыйааһыҥҥа массыынаны бүтүннүү туруоран, кэлбит бөх ыйааһынын автомат кээмэйдиир. Ыйааһыннааһын полигоҥҥа киирэргэ уонна тахсарга оҥоһуллар. Евгений Григорьев кыһалҕалаах боппуруостары дьүүллэстэ уонна полигоҥҥа кумах аҕалалларын курдук сорудахтаата. 
«Жилкомсервис» МУТ материальнай-техническэй бөҕөргөтүүгэ өрөмүөннүүр баазалаах саҥа гараас уонна тэрилтэ дьаһалтатын тутуутун бырайыактыыр-сметалыыр докумуонун оҥорор туһунан быһаарыы ылылынна. Тэрилтэ үлэһиттэрин этиитинэн аныгы түргэнник тутар технологиялар туттуллуохтара. 
Итини таһынан, Евгений Григорьев оробуочай кэлэктииби кытта паарканы кэҥэтии, хоммунаалынай тиэхиньикэ кыамтатын улаатыннарыы, диспетчерскэй сулууспаны уопсай цифровизациялааһын туһунан дьүүллэстэ.