Евгений Григорьев ыччат лидердэрин кытта көрүстэ

Ыччат күнэ Сэбиэскэй Сойуус саҕаттан 1958 сылтан бэлиэтэнэр. 1993 сылтан бырааһынньык бэс ыйын 27 күнүгэр бэлиэтэнэр уонна Арассыыйа ыччатын күнэ диэн ааттанар буолбута. Ыччат күнүнэн сибээстээн куорат баһылыга Евгений Григорьев общественнай тэрилтэлэр уонна ыччат хамсааһынын көҕүлээччилэрин кытта көрүстэ.
Көрсүһүү эпидемиологическэй туругу учуоттаан онлайн көрүҥүнүнэн барда. Тэрийээччинэн Уокуруктааҕы дьаһалта ыччат уонна дьиэ кэргэн политикатыгар Управлениета буолла. 
Баһылык Дьокуускай эдэр куорат буоларын, олохтоохтор орто саастара 32 диэн бэлиэтээтэ. «Лидердэр, ыччат хамсааһынын көҕүлээччилэрэ, куорат олохтоохторо куораты салайыыга, тупсарыыга, уопсастыбаннай институттар сайдыыларыгар кыттыахтаахтар», - диэн тоһоҕолоон бэлиэтээтэ Евгений Григорьев. 
«Юный горожанин» хамсааһын кыттыылааҕа Василий Артемьев ыйытыгар хоруйдаан, Евгений Григорьев Ленин проспегар ыытыллар капитальнай өрөмүөн уонна хаарбах туруктаах дьиэлэртэн олохтоохтору көһөрүү бырагырааматын олоххо киллэрии туһунан кэпсээтэ. 
«Ылыныллыбыт былаан чэрчитинэн 2032 сылга диэри, Дьокуускай куорат төрүттэммитэ 400 сылын көрсө, куорат территориятыгар биир да хаарбах туруктаах дьиэ хаалыа суохтаах », - диэтэ куорат баһылыга.
Итини сэргэ баһылык ыйытыктарга хоруйдаан «Куттала суох, хаачыстыбалаах суоллар» национальнай бырайыак иһинэн ыытыллар суол өрөмүөнүн, скейт-паарка тутуутун туһунан кэпсээтэ. 
«Экстремальнай спорт көрүҥнэрин сайыннарар сыаллаахпыт. Ити хайысханан Казань куорат уопутун баран үөрэтэн кэллибит. Билигин 2022 сылга сабыылаах скейт-паарканы тутаары балаһаакка тала сылдьабыт», - диэтэ Евгений Григорьев.
Ыйытыктарга хоруйдуурун сэргэ куорат баһылыга ыччат санаатын, этиилэрин иһиттэ. Уокуруктааҕы дьаһалта ыччат уонна дьиэ кэргэн политикатыгар Управлениетын начальнига Ирина Атласова көрсүһүү кыттыылаахтарыгар дьаһалтаҕа сүбэлэһэр, мунньахтыыр ыччат дьаһалтатын тэрийии туһунан билиһиннэрдэ.