Евгений Григорьев «Якутский казачий полк» штабыгар сырытта

Бу күннэргэ куорат баһылыга Евгений Григорьев уокуруктааҕы казаактар штабтарыгар сылдьан «Якутская городовая казачья команда» Устаапка илии баттаата.
Көрсүһүүгэ куорат баһылыга уонна казачество бэрэстэбиитэллэрэ уопсай былааннарын уонна инники өттүгэр бииргэ үлэлээһиннэрин туһунан кэпсэттилэр. 
«Куораттааҕы казаактар хамаандалара уопсастыбаннай бэрээдэк бөҕөргүүрүгэр, үүнэр көлүөнэни сөптөөх хайысханан иитиигэ судаарыстыба сүрүн соруктарыгар бэйэтин дьоһун кылаатын киллэрэр», - диир Евгений Григорьев.

Казаактар уопсастыбаларын чилиэннэрэ куорат баһылыгар махтанан туран куорат сайдыытын туһугар биир санаанан үлэлиир баҕаларын бигэргэттилэр. «Дьокуускайдааҕы казаактар хамаандалара өрүү куорат тирэҕэ, өйөбүлэ этэ. Сүрүн көмөбүт – өрөспүүбүлүкэ бүттүүнүгэр уопсастыбаннай бэрээдэги көрүү буолар», - диэтэ «Якутская городовая казачья команда» атамаана Иван Мещеряков. 
«Якутская городовая казачья команда» Устааба Саха сирин Баһылыга Айсен Николаев бигэргэппит 154 №-дээх ФЗ федеральнай сокуоҥҥа сөп түбэһэн, СӨ казачество сайдар стратегиятын чэрчитинэн илии баттаммыт.