Евгений Григорьев: «Владимир Путин тус болҕомтото маастар-былаан олоххо киирэригэр эрэли эбэр»

Бэс ыйын 18 күнүгэр Дьокуускайга дойду баһылыга Владимир Путин оробуочай сырыытынан кэлэн барда. Куорат баһылыга Евгений Григорьев бэлиэтээбитинэн, Дьокуускай куорат социальнай, экономическай сайдыытыгар, нэһилиэнньэ олоҕун уйгута тупсарыгар судаарыстыба баһылыгын болҕомтото маастар-былаан олоххо киирэригэр эрэли эбэр. 
«Үлэ кыбаартала» кластерга буолбут көрсүһүүгэ Ил Дархан Айсен Николаев дойду баһылыгар Дьокуускай куорат маастар-былаанын олоххо киллэрии туһунан иһитиннэриини оҥорбута. Санатар буоллахха, бүгүҥҥү күҥҥэ былааннаммыт 90 бырайыактан 23 саҕаланна», — диир Евгений Григорьев.
Ол курдук, Сайсары күөл уонна Р. М. Дмитриев аатынан кытыл, сөтүөлүүр сир, Ленин болуоссата, 1 №-дээх оскуола, уулусса-суол ситимэ барыта маастар-былааҥҥа киирбит бырайыактар. 
Хаарбах дьиэлэр олохтоохторун көһөрөн, саҥа «Спортивнай» уонна «Звезднай» түөлбэлэр тутуллаллар.
«Владимир Путин сорудаҕынан 2030 сылга диэри Дьокуускай куоракка биир даҕаны хаарбах туруктаах дьиэ суох буолуохтаах. Ол аата тыһыынчанан киһи аныгылыы дьиэҕэ көһүөхтээх. Оттон дойду баһылыгын сорудаҕынан уонна өйөбүлүнэн ылыллыбыт маастар-былааны олоххо киллэрии тэтимэ сыл аайы улаатан эрэ иһиэҕэ. Биһигини элбэх, баараҕай үлэ күүтэр, ону, былаас, урбаан уонна уопсастыба күүстэрин түмэн, кыайыахпыт», — диэн тоһоҕолуур Евгений Григорьев.

Источник: СИА
Мария Васильева, СИА, хаартыскаҕа түһэриитэ