Евгений Григорьев урукку кооперативнай техникум дьиэтигэр сырытта

Киин куорат баһылыга Евгений Григорьев ахсынньы 13 күнүгэр быстах болдьоххо 1 №-дээх орто оскуола үлэлиэхтээх сиригэр – урукку потребительскай кооперация торговай-экономическай колледжын дьиэтигэр сылдьан хапытаалынай өрөмүөн хаамыытын бэрэбиэркэлээтэ. Өрөмүөн 2022 сыл олунньу ыйыгар түмүктэнэн, кулун тутар ыйтан үөрэх саҕаланыахтаах. Ол туһунан Уокуруктааҕы дьаһалта пресс-сулууспата иһитиннэрдэ.
Өрөмүөннүүр-таҥар үлэ сакаасчыгынан  «Главстрой» МХТ буолар, бэдэрээччик – «Оптима-Строй» ХЭТ.
«Главстрой» МХТ салайааччыта Алексей Варламов иһитиннэрбитинэн, өрөмүөн бары этээстэргэ график быһыытынан баран иһэр. Өрөмүөн сыанатын чопчулуурга туһуламмыт бырайыактыыр-сметалыыр докумуон үлэтэ түмүктэнэн эрэр. 
Бэдэрээччик тэрилтэ прораба эппитинэн, урукку колледж дьиэтигэр өрөмүөн ыытарга хантыраак алтынньы 15 күнүгэр түһэрсиллибит. Итини кытта тэҥҥэ бырайыактааһын уонна көтүрүү үлэтэ саҕаламмыт. Балтараа ый иһигэр хапытаалынай өрөмүөн чэрчитинэн улахан хабааннаах үлэ ыытыллыбыт. 
«Билигин эбийиэги тупсарар-ситэрэр үлэҕэ бэлэмниибит, таһынааҕы уонна иһинээҕи уот ситимин оҥоробут. Бары инженернай ситимнэри көтүрдүбүт, коммуникациялары уларыттыбыт, ол иһигэр ититэр систиэмэни уонна вентиляцияны», – диэн бэлиэтээбит  прораб Дмитрий Югай.
Дьиэни көрүү кэмигэр хапытаалынай өрөмүөн үбүлээһинин боппуруоһун дьүүллэспиттэр. Евгений Григорьев туох наадалааҕын боротокуолунан толорон олохтоох дьаһалта үпкэ Департаменыгар киллэрэргэ бэлэмнииргэ, ону сэргэ тутуу матырыйаалларын уонна сөптөөх тэрили аҕалааччылары кытта үлэни күүһүрдэргэ сорудахтаабыт. 
Итини тэҥэ 2022 сыл сааскы-сайыҥҥы кэмҥэ дьиэ таһынааҕы территорияны тупсарыы былааннанар.