Евгений Григорьев урбаан үлэһиттэрин иннигэр отчуоттаата

Тохсунньу 25 күнүгэр Олохтоох дьаһалта ааспыт 2022 сыллааҕы үлэтин түмүгүнэн отчуотун уонна үүммүт сылга турар соруктар тула урбаан эйгэтин үлэһиттэрин кытта кэпсэтиитигэр баһылык Евгений Григорьев нэһилиэнньэ ахсаана элбиирэ куорат сайдыытын түстүүрүн уонна урбаан эйгэтигэр үчүгэйдик сабыдыаллыырын бэлиэтээн туран, бүгүҥҥү күҥҥэ олоххо киллэриллэр бары федеральнай, өрөспүүбүлүкэтээҕи уонна муниципальнай бырайыактар урбаанньыттарга саҥа кыахтары арыйаллар диэтэ.
2022 сыллаахха Дьокуускайга 19 693 урбаанньыт бэлиэтэммит, бу ковид иннинээҕи 2019 сыллааҕы көрдөрүүттэн быдан элбэх. Маныаха нолуок ставкатын намтатыы улахан оруолу оонньообута, итини сэргэ киин куорат урбаанньыттарыгар «Дьокуускай куорат” куораттааҕы уокурук сайдыытын пуондата» кирэдьиит тэрилтэтэ эмиэ тирэх буолбута бэлиэтэннэ. Ол курдук, ааспыт 2022 сылга бу тэрилтэ куорат урбаанньыттарыгар 103 мөлүйүөн солкуобай иэннээх иэһи 5% биэрбит, ол иһигэр 12 урбаанньыкка 11 мөлүйүөн солкуобай иэннээх иэс уһун болдьоххо бэриллибит.
Ааспыт сылга тыа хаһаайыстыбатын бородууксуйатын оҥорон таһаарыыга үчүгэй көрдөрүү бэлиэтэммит, ол иһигэр «Саюри» ХЭТ 2021 сыллааҕар икки бүк элбэх бородууксуйаны оҥорон таһаарбыт. 
Биллэн турар, арыгынан эргинии боппуруоһа таарылынна. 2022 сыллаахха Дьокуускай куорат Олохтоох дьаһалтатын «Об определении границ прилегающих территорий, на которых не допускается розничная продажа алкогольной продукции и розничная продажа алкогольной продукции при оказании услуг общественного питания на территории городского округа «город Якутск» 118п№-дээх уурааҕар уларытыылар киирбиттэрэ. Бу хайысхаҕа куорат дьаһалтата Ил Түмэни кытта «Об установлении дополнительных ограничений оборота алкогольной продукции» өрөспүүбүлүкэ таһымнаах сокуоҥҥа уларытыылары киллэриигэ бииргэ үлэлиир. Дьокуускай куорат олохтоохторо арыгы атыытын хаарчахтааһыны утаран 10 тыһыынча илии баттааһыны хомуйдулар. Бу дьайыылары, быһаарыылары урбаанньыттар өйүүллэрин биллэрдилэр. 
Отчуоту истэн баран урбаанньыттар бэйэлэрин ыйытыыларын биэрдилэр. Ол курдук, Куораты тупсарыы быраабылатыгар дьиэлэр фасадтарын көрүү-истии чааһыгар киирбит уларыйыыга тохтоотулар. Евгений Григорьев быһаарбытынан, куорат олохтоох дьаһалтата, бастатан туран, нэһилиэнньэ интэриэһинэн салайтарар, нэһилиэнньэҕэ куттал суох буолуутун хааччыйарга кыһаллар, оттон урбаанньыт бэйэтин баайын-дуолун иннигэр эппиэтинэһи сүгүөхтээх, өрөмүөнү кэмигэр ыытыахтаах. 
202-с дьоҕус оройуоҥҥа турар салгын подушкаларын олорор дьиэлэр тастарыттан анал ыстаансыйаҕа көһөрүү күүтүллэр. Манна уопсастыбаннай тырааныспар эргийэригэр анаан аспаал кутуллуохтаах.
«Саюри» ХЭТ салайааччыта сорох маҕаһыыннар кинилэр бреннэрин аатынан туора бородууксуйаны атыылыыр түгэннэрэ бэлиэтэммитин этэн, Евгений Григорьев хонтуруоллуур уорганнар кыттыылаах бэрэбиэркэни ыыттарыах буолла. 
Чааһынай оҕо саадтара субсидия кээмэйэ кыратын, оскуола остолобуойдара актированнай күннэргэ хамнаһа суох туралларын этинэннэр, бу боппуруостары Үөрэх управлениетыгар көрүөх буоллулар. 
Култуура уонна сынньалаҥ пааркатын таһыгар аквапарка туһунан ыйытыыга баһылык тутуу чааһынай инвестор үбүнэн тутуллуохтаах диэн хоруйдата. 
Маны сэргэ урбаанньыттар сылаас тохтобулларга атыыны-эргиэни ыытары, эти переработкалыыр оборудование атыылаһарга, тыа хаһаайыстыбатын бородууксуйатын оҥорон таһаарыыга субсидия көрдөөтүлэр. 
Оттон чааһынай спорт оскуолалар хаһаайыттара куорат дьаһалтатыгар чөл олоҕу тарҕатыыга өйөбүл иһин махтаннылар, самбо секциятын арыйыы боппуруоһун көтөхтүлэр.