Евгений Григорьев тырааныспар, тутуу эйгэтин үлэһиттэрин кытта көрүстэ

Тохсунньу 19 күнүгэр Евгений Григорьев тутуу, тырааныспар уонна суол эйгэтин үлэһиттэрин кытта ааспыт 2022 сыл түмүктэрин уонна 2023 сыллааҕы былааны кэпсэттэ. 

Евгений Григорьев ааспыт 2022 сыл төһө да ыарахаттары туруордар, кэккэ хайысхаларга, ол иһигэр федеральнай киин өйөбүлүнэн сүҥкэн ситиһиилэрдээхпит, онон күүспүтүн түмтэхпитинэ, санаабытын сомоҕолоотохпутуна, үгүһү ситиһэр кыахтаахпытын дакаастаатыбыт диэтэ. 

Олорор дьиэни, социальнай эбийиэктэри тутуу, хаарбах дьиэттэн көһөрүү, тырааныспар инфраструктуратын сайыннарыы, уопсастыбаннай тырааныспар пааркатын саҥардыы, суол тутуутун, өрөмүөнүн, гаастааһын эйгэтигэр 2022 сылга элбэх үлэ ыытыллыбыта бэлиэтэннэ. 

Үүммүт 2023 сылга ити үлэ барыта салҕанар. Ол курдук, аҥаардас суол эйгэтигэр уопсайа 21 км усталаах хапыталынай өрөмүөн, саҥардыы үлэтэ былааннанар. Уопсастыбаннай тырааныспар саҥа таһымҥа тахсара, онуоха эбии саҥа оптуобустары атыылаһыы күүтүллэр. Куораты тупсаран оҥоруу болҕомто кииниттэн тахсыбат. Ол иһигэр Сайсары күөл кытылын, Ийэ скверин өрөмүөнэ, 38 тиэргэни тупсаран оҥоруу курдук баараҕай бырайыактар киирэллэр. Кыайыы пааркатыгар «Патриоттар аллеялара», «Дьокуускай – килбиэннээх үлэ куората» бэлиэ тутуллуохтара. «Сырдык столица» муниципальнай бырагырааманан 10 км тахса усталаах уулусса уота холбонуоҕа.

Социальнай гаастааһын, элбэх оҕолоохтор кыбаарталларыгар гааһы киллэрии, 3 N-дээх канализационнай коллекторы уонна 5 №-дээх уу ороскуотун  кээмэйдиир тиһиги тутуу салҕаныахтара.

Куораты тутууга бэдэрээттээх тэрилтэлэр, тутуу тэрилтэлэрин, суол хаһаайыстыбатын бэрэстэбиитэллэрэ баһылыктан хаарбах дьиэттэн көһөрүүгэ о.д.а. эбии үп ирдэнэрин, территориялары комплекснайдык сайыннарыы, саҥа тутуллубут элбэх мэндиэмэннээх дьиэлэргэ киирэр суоллары тутуу курдук тыын боппуруостары биэрдилэр.