Евгений Григорьев тус приема буолан ааста

Бэс ыйын 24 күнүгэр куорат баһылыгын тус приемугар элбэх кыбартыыралаах дьиэлэр олохтоохторо көҥүлэ суох тутуллубут кафе уонна итирдэр утаҕынан эргинэр тэрилтэ боппуруостарын быһаарарга көрдөстүлэр. Маны сэргэ анал байыаннай дьайыы кыттыылааҕын дьиэтин кыһалҕата көрүлүннэ. 
Ол курдук, Ленин проспегар турар икки элбэх кыбартыыралаах дьиэ олохтоохторо кинилэр тастарыгар үлэлиир кафе уонна итирдэр утаҕынан эргинэр тэрилтэ киирэр ааннара олорор дьиэлэрин тиэргэннэригэр тахсарын сокуону кэһиинэн ааҕаллар. Маны сэргэ өссө биир маҕаһыын уопсастыбаннай туонаны хабарын, бас билээччилэр ааһа баран онно холодильнай камералаах эбийиэк туттубуттарын ыйаллар. Олохтоох дьаһалта Быраапка департаменын бэрэссэдээтэлэ иһитиннэрбитинэн, бу боппуруос куорат суутугар көрүллэ сылдьар эбит. Маны сэргэ дьиэни бас билээччилэр олорор дьиэлэр тастарыгар тутуллубут хочуолунай тыаһын-ууһун, буортулаах эттиктэри таһаарарын, эбийиэккэ ону бохсор оборудование суоҕун ыйаллар. 
Евгений Григорьев быһаарбытынан, бу боппуруоска Олохтоох дьаһалта муниципальнай кыбартыыралаахтар интэриэстэрин суут быһаарыытыгар олоҕуран көмүскүөн сөп. Олохтоохтор үҥсүүлэрин  суукка биэрэргэ Олохтоох дьаһалта көмөлөһөр кыахтаах. 
Бу күн баһылыкка анал байыаннай дьайыы кыттыылааҕа кэлэн, олорор дьиэҕэ кыһалҕалааҕын кэпсээтэ. Дежнев уулуссатыгар турар дьиэҕэ баһаар турбутун түмүгэр кини кыбартыырата киһи олорбот гына эмсэҕэлээбит.
Баһылыгы кытта кэпсэтии түмүгүнэн анал байыаннай дьайыы кыттыылааҕын дьиэ кэргэнигэр маневреннай пуондаттан хос бэриллиэҕэ, биир кэмнээх материальнай көмө оҥоһуллуоҕа. Маны сэргэ киниэхэ дойду баһылыга Владиимир Путин көҕүлээһининэн олоххо киирэр «Доступное арендное жильё в ДФО» бырагырааманан олорор дьиэни чэпчэтиилээх сыанаҕа наймылаһар кыах баарын билиһиннэрдилэр. 
Санатар буоллахха, баһылык гражданнары кытта эрдэттэн суруйтарыынан көрсөр. Көрсүһүүгэ суруйтарарга Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Сайабылыанньаҕа быһаартарыахтаах боппуруоһу сиһилии ыйар уонна инники өттүгэр атын инстанцияларынан туох быһаарыы ылыллыбытын сыһыарар наада. Маны сэргэ тус дааннайдары ыйар ирдэнэр: төлөпүөн нүөмэрэ, электроннай аадырыс.
Сайабылыанньаны ыытар ньымалар:
– yakutsk@sakha.ru Олохтоох дьаһалта официальнай электроннай почтатыгар;
– 40-80-76 төлөпүөнүнэн;
– Дьокуускай к., Ленин проспега, 15 аадырыска тиийэн;
– Сурук отделын аадырыһа: Дьокуускай к., Ленин проспега, 15, 113 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).