Евгений Григорьев Сайсары уокуругар үлэлээтэ

Сэтинньи 19 күнүгэр нэдиэлэтээҕи уокуруктары уонна куорат кытыытын кэрийии чэрчитинэн Евгений Григорьев Сайсары уокуругар көһө сылдьар мунньаҕы ыытта. Куорат баһылыга «Школьный мир» библиотекаҕа сырытта,  «Гимеин» оройуонугар саҥа уопсастыбаннай миэстэ тутуллуон сөптөөх сирин уонна  Билибин уул., 13 элбэх кыбартыыралаах дьиэни киин канализацияҕа холбуур боппуруоһу  көрдө. Ол туһунан Уокуруктааҕы дьаһалта пресс-сулууспата иһитиннэрдэ. 
Маяковскай уул., 81 баар «Школьный мир» библиотека кэлэктиибэ куорат баһылыгар саҥа дьиэ наадатын туһунан эттэ. Билигин үлэлиир дьиэлэрэ 1971 сыллаахха тутуллубут, билиҥҥи туруга оҕо библиотекатын ирдэбилигэр  эппиэтээбэт. 
«Манна тымныы, дьиэ үрдэ аллараа түһэн турар, үлэһиттэр тымныйан сотору-сотору ыалдьаллар. Өрөмүөн бүтэһигин 2007 сыллаахха оҥоһуллубут. Дьиэ иэнэ – 252 кв. м. Библиотекабыт бэйэтэ туспа историялаах уонна Сайсары уокуругар соҕотох култуура киининэн буолар. Манна айар интеллигенция бэрэстэбиитэллэрин кытта көрсүһүүлэр, презентациялар, кыраайы үөрэтэр кулууптар мунньахтара ыытыллар. Сылын аайы 5 тыһыынчаттан тахса ааҕааччы сылдьар, пуондабытыгар 29 тыһыынча кинигэ баар», – диэн кэпсээтэ  сэбиэдиссэй Валентина Яковлева.
Евгений Григорьев туһааннаах структураларга уокурукка спорт саалалаах, кулууптаах уонна библиотекалаах элбэх функциялаах киини тутар боппуруоһу быһааралларын курдук сорудахтаата. 
«Гимеин» эргийэр суолугар куорат баһылыга сокуоннайа суох атыы миэстэтин уонна уопсастыбаннай миэстэни тутуохха сөптөөх сири көрдө. Куорат территорияларын тупсарыы чэрчитинэн олохтоохторго уопсастыбаннай миэстэ тутар туһунан этиини Сайсары уокуругун Управатын салайааччыта Владимир Слепцов киллэрбит. 
Кэрийии түмүгүнэн баһылык Уокуруктааҕы дьаһалта куораты тутар блогар ити бырайыагы олоххо киллэрэр былааҥҥа эбэллэригэр сорудахтаата. Итини сэргэ, кини тупсарыы бырагырааматыгар Лермонтов уулуссатын 138 №-дээх дьиэтин территорията киирэрин бэлиэтээтэ.  
Билибин уул., 13 сыһыаннаан «Сфера комфорта» салайар хампаанньа бэрэстэбиитэллэрэ эппиттэринэн, кыһыҥҥы кэмҥэ «Жилкомсервис» МУТ кыайан хачайдаабат, ол иһин турбалар тоҥоллор уонна тиһиктээхтик чалбахтар үөскүүллэр. Салайар хампаанньаҕа дьиэни киин канализация ситимигэр холбуурга бырайыактыыр-сметалыыр докумуоннары оҥороллоругар сүбэлэннэ. 
Евгений Григорьев салайар хампаанньалар салайааччыларын кытта мунньахтаата, тиэргэн территорияларын тупсарыы бырагырааматыгар көннөрүүлэри киллэрэллэрин курдук эттэ. Итини сэргэ мунньахха канализация ситимнэрин тупсаран оҥоруу туһунан этиилэр киирдилэр. 
«ОДьКХ систиэмэтин кыһалҕаларын кыттыһан быһаарыахпытын наада. Нэһилиэнньэни кытта кэпсэтиини сатаан ыытар улахан суолталаах. Үчүгэй салайар хампаанньа намыһах тарифтаах буолбатах – хаачыстыбалаах уонна түргэн өҥөлөрдөөх», – диэн бэлиэтээтэ  Евгений Григорьев.