Евгений Григорьев санитарнай ирдэбиллэри хонтуруоллааһыны күүһүрдэргэ сорудахтаата

Куорат баһылыга Евгений Григорьев балаҕан ыйын 29 күнүгэр куораттааҕы суһал штабы уонна ЫБМ Хамыыһыйатын кытта COVID-19 коронавируснай инфекцията тарҕанарын утары тэрээһиннэри ыытааһыҥҥа сүбэ-мунньаҕы салайда. Бу туһунан Уокуруктааҕы дьаһалта пресс-сулууспата иһитиннэрдэ.
Мунньахха РФ КоАП 27.10 ыстатыйатынан, хааччахтыыр миэрэлэри кэһэр тэрилтэлэр бас билээччилэриттэн муусука тэриллэрин былдьааһыны салҕыыр наадалааҕа бэлиэтэннэ. Административнай хамыыһыйа бэрэссэдээтэлэ Феликс Антонов иһитиннэрбитинэн, инники түүҥҥү тэрилтэттэн ылыллыбыт муусука тэрилэ суут быһаарыытынан төттөрү бэриллибит. Прокуратура сокуоннайа суох былдьаммытын быһаарбыт. Куорат баһылыга итини көтүттэрэргэ сорудахтаата. 
«Түүҥҥү тэрилтэлэр бобуллубутун билэн туран тиһиктээхтик элбэх дьону мунньаллар», – диэтэ Евгений Григорьев.
Дьокуускай куоратын ГО уонна ЫБМ Управлениетын салайааччыта  Николай Егоров иһитиннэрбитинэн, РФ КоАП 20.6.1. ыстатыйата толоруллубатаҕын иһин 69 боротокуол толоруллубут, онтон 30 боротокуолугар суут быһаарыыта ылыныллыбыт, уопсайа 1 мөл. 234 тыһыынча солкуобай суумалаах ыстараап суруллубут. 
Уокуруктааҕы дьаһалта предпринимательствоҕа, потребительскэй ырыынакка, туризм сайдыытыгар Департаменын салаатын начаалынньыга Дмитрий Туприн информациятынан, ааспыт нэдиэлэҕэ атыы-эргиэн 224 эбийиэгэр санитарнай-эпидемиологическай миэрэлэри тутуһууну хонтуруоллааһын ыытыллыбыт. Ол түмүгүнэн СӨ Кодексын 3.8 ыст. олоҕуран 2 боротокуол толоруллубут. Бу нэдиэлэҕэ атыы-эргиэн 68 эбийиэгэ бэрэбиэркэлэнэн 2 сокуону кэһии тахсыбыт, боротокуоллар оҥоһуллубуттар. 
«Барыта атыы-эргиэн 22 876 эбийиэктэрэ бэрэбиэркэлэннэ, 318 боротокуол толорулунна», – диэн иһитиннэрдэ Дмитрий Туприн.
Уопсастыбаннай тырааныспары бэрэбиэркэлээһин туһунан куораты тутууга уонна тырааныспар инфраструктуратын Департаменын салаатын начаалынньыга Петр Седалищев иһитиннэрдэ. Кини эппитинэн, балаҕан ыйын 29 күнүнээҕи туругунан 76 оптуобус бэрэбиэркэлэммит. Олортон 64 оптуобус санитарнай ирдэбилгэ эппиэттиир, 12-тэ – эппиэттээбэт. Суоппардары коронавирус инфекциятын утары вакцинациялааһын салҕанар, бүгүҥҥү күҥҥэ 169 суоппар быһыыны ылбыт. 
Административнай хамыыһыйа бэрэссэдээтэлэ Феликс Антонов иһитиннэрбитинэн, оптуобустарга маасканы кэтээһин нэдиэлэҕэ үстэ бэрэбиэркэлэнэр. 
Уөрэҕирии Управлениетын начаалынньыга Алексей Семенов билиҥҥи туругунан, ОРВИ уонна грипп ахсаана элбээбитинэн сибээстээн бары муниципальнай оскуолалар, эбии үөрэхтээһин тэрилтэлэрэ дистанционнай көрүҥүнэн үлэлииллэрин иһитиннэрдэ. Оҕо уһуйааннарын 66 бөлөҕө харантыыҥҥа бааллара этилиннэ.