Евгений Григорьев «Прямой эфир с городом» бырагыраамаҕа кыттар

Бүгүн, сэтинньи 22 күнүгэр олохтоох бириэмэнэн 18.00 чааска куорат баһылыга Евгений Григорьев «Россия 24» ханаалыгар «Прямой эфир с городом» биэриигэ кыттан олохтоохтор ыйытыктарыгар хоруйдуоҕа. Быһа эфири «Вести Саха» ютуб-ханаалыгар эмиэ көрүөххэ сөп. Бу туһунан Уокуруктааҕы дьаһалта пресс-сулууспата иһитиннэрдэ. 
Евгений Григорьев телевизоры көрөөччүлэргэ куорат социально-экономическэй сайдыытын былаана олоххо киириитин, «Куттала суох уонна хаачыстыбалаах суоллар» национальнай бырайыак чэрчитинэн 2021 сылга ыытыллыбыт суол өрөмүөнүн, ититии кэмин, коронавирус дьаҥын тарҕаппат сыаллаах тэрээһиннэр уонна да атын тыын суолталаах боппуруостар тустарынан кэпсиэҕэ. 
Телевизоры көрөөччүлэр бэйэлэрин ыйытыктарын быһа эфир кэмигэр 32-02-02 нүөмэргэ собуоннаан биэриэхтэрин сөп. Биэрии бириэмэтигэр баттаһан киирбэтэх ыйытыктар куорат баһылыгар салгыы үлэлээһиҥҥэ бэриллиэхтэрэ.