Евгений Григорьев Окружной шоссеҕа үлэ хаамыытын бэрэбиэркэлээтэ

Балаҕан ыйын 10 күнүгэр куорат баһылыга Евгений Григорьев «Куттала суох уонна хаачыстыбалаах суоллар» национальнай бырайыак чэрчитинэн капитальнай өрөмүөннэнэр Окружной шоссеҕа үлэ хаамыытын бэрэбиэркэлээтэ.
Окружной шоссе капитальнай өрөмүөнүн бэдэрээччик «Дорстрой» ХЭТ уонна суббэдэрээччик «Кинг-95» ХЭТ ыыталлар. Саҥардыллан оҥоһуллар суол уһуна 4,2 км. Эбийиэк өрөмүөнэ быйыл түмүктэниэхтээх. 
Евгений Григорьев бэлиэтээбитинэн, тутулла турар эбийиэк Бүлүү трагын уонна аэропорт оройуонун кытта сибээстээх суол учаастактарын ноҕуруускалара аҕыйыырыгар улахан оруоллаах буолуоҕа. 
«Окружной шоссе Столичнай ырыынак өттүттэн кэлэр түөрт балаһалаах суол логическай салҕыыта буолар. Ити курдук, биһиги Дьокуускай куорат «объездной каркаһын», ол иһигэр улахан уйуктаах тиэхиньикэҕэ оҥоробут», – диэтэ куорат баһылыга.
Билиҥҥи туругунан, Окружной шоссеҕа үлэ түмүктэнэн эрэр, тупсаран оҥоруу эбийиэктэрин таҥааһын ыытыллар. 
«Финишка чугаһаатыбыт, сатыы сылдьар дьон уонна барьер хааччахтарын, сырдатыы 44 тирээбиллэрин уонна 278 суол бэлиэлэрин туруорарбыт хаалла», – диэн иһитиннэрдэ  Евгений Григорьев.
Окружной шоссе аспааллаах тротуардара бэлэсипиэт суоллардаах буолуоҕа. Дьокуускай куоракка аан бастакы төгүлүн улахан хабааннаах бэлэсипиэт суолларын инфраструктурата оҥоһулунна. Итинник быраактыканы «Куттала суох уонна хаачыстыбалаах суоллар» национальнай бырайыак атын эбийиэктэригэр эмиэ туттар былаан баар.