Евгений Григорьев Марха дьоҕус оройуонугар мунньахтаата

Куорат баһылыга Евгений Григорьев Марха дьоҕус оройуонун кэрийэн көрдө уонна мунньаҕынан түмүктээтэ. Бу туһунан Олохтоох дьаһалта пресс-сулууспата иһитиннэрдэ.
Баһылык Мелиоратордар уонна Заводской уулуссаларга уу ыытыытын кыһалҕалаах сирдэрин көрдө. Марха дьоҕус оройуонун дьаһалтатын баһылыга Николай Ксенофонтов информациятынан, ити учаастактары мэлдьи халаан, ардах уулара ылаллар. Евгений Григорьев эппиэтинэстээх структураларга кыһалҕалаах учаастактарга ууну ыытар систиэмэни оҥоруу боппуруоһун быһаарарга үлэлииллэригэр сорудахтаата. 
Итини таһынан куорат баһылыга гражданнары кытта сирэй көрүстэ. Марха олохтоохторо «Колосок» СОТ гаастааһынын, саад-оҕуруот табаарыстыбаларын тус олорор дьиэ туттар разрядка көһөрүүтүн, уу ситимин холбооһунун туһунан ыйыталастылар.
Гаастааһын боппуруоһугар Евгений Григорьев быйыл бырайыактыыр-сметалыыр докумуон оҥоһулларын, онтон 2023 сылга тутар-таҥар үлэ саҕаланарын туһунан эттэ. Атын ыйытыктар бары хонтуруолга ылыллан, сотору кэминэн толору хоруй бэриллиэхтээх. 
Дьоҕус оройуону кэрийэн көрүү түмүгүнэн куорат баһылыга Марха дьаһалтатын кэлэктиибин уонна салайар хампаанньалары кытта мунньахтаата. 
"Кэнники сылларга Марха дьоҕус оройуонугар суол тутуутугар, таһынааҕы сырдатыы тирээбиллэрин туруорууга улахан үлэ ыытылынна. Манна олорор дьиэ тутуута көхтөөхтүк барар, ол аата дьоҕус оройуон сайдан иһиэҕэ. Биһиги иннибитигэр элбэх сорук турар, быйыл оҕо балаһааккалара үлэҕэ киириэхтэрэ, суол уонна олох-дьаһах инфраструктуратын боппуруостарын быһаарыахпыт, итини кытта кэллиэгэлэрбэр спорт саалатын бырайыактааһынын уонна тутуутун боппуруоһун көрөллөрүгэр этии киллэрдим", – диэтэ Евгений Григорьев. 
Мархаҕа мунньах нэдиэлэ аайы уокуруктары кэрийии, кыһалҕалары миэстэтигэр дьүүллэһии уонна быһаарыы чэрчитинэн ыытылынна.