Евгений Григорьев Мархаҕа байыаннай сулууспалаахтар дьиэ кэргэттэрин кытта көрүстэ

Көрсүһүүгэ Дьокуускай куорат прокурора Антон Николенко, СӨ киһи быраабыгар уполномоченнайа Сардана Гурьева, Нэһилиэнньэ социальнай харалтатыгар уонна үлэҕэ управление салайааччыта Семен Матвеев, Анал байыаннай эпэрээссийэ кыттыылаахтарын дьиэ кэргэттэрин өйүүр киин салайааччыта Туйара Колесова кытыннылар.

Дьиэ кэргэттэри кытта көрсүһүү «ыйытык-хоруй» форматынан барда.

Анал байыаннай эпэрээссийэ кыттыылааҕын ийэтэ анаммыт төлөбүрү, уолун баан каартатыгар бобуу ууруллубут буолан, кыайан ылбатаҕын туһунан кэпсээтэ. Сорох дьон эмиэ итинник балаһыанньаҕа түбэспиттэр.  Евгений Григорьев иһитиннэрбитинэн, ити боппуруоска бааннары, суут приставтарын кытта ыкса үлэ барар, ол түмүгүнэн мобилизацияламмыт киһиттэн кредити төлөөһүнү ирдээһин тохтуур. Кинилэр дьиэ кэргэттэригэр төлөбүрү ыларга көмө оҥоһуллуоҕа.

Сорох дьиэ кэргэттэр байыаннай сулууспалаах анал байыаннай эпэрээссийэҕэ кыттарын туһунан докумуону ылыыга ыарахаттары көрсүбүттэр. Итиэннэ дьонноро чэпчэтиилээх ипотека усулуобуйаларын, хаарбах туруктаах дьиэттэн көһөрүүнү интириэһиргииллэр.

Олох-дьаһах хомунаалынай өҥөтүн иһин төлөбүргэ чэпчэтиилэри ыйыппыттарыгар, Евгений Григорьев мобилизацияламмыт дьон дьиэ кэргэттэрэ иэстээх буоллахтарына бырыһыан ааҕыллыбат диэн быһаарда.

Үгүс ыйытык Дьокуускай куорат прокурора Антон Николенко аатыгар киирдэ. Кини бары боппуруостары биирдиилээн, байыаннай прокуратураны кытта бииргэ үлэлэһэн, быһаарыахпыт диэтэ.

Көрсүһүү түмүгэр Марха олохтоохторо – мобилизацияламмыттар дьиэ кэргэттэрэ Олохтоох дьаһалтаҕа уонна дьоҕус оройуон дьаһалтатыгар көмөлөрүн, өйөбүллэрин иһин махталларын тиэртилэр.