Евгений Григорьев Дьокуускайга медвытрезвители аһарга сорудахтаата

Куорат баһылыга Евгений Григорьев бүгүҥҥү куораттааҕы планеркаҕа медвытрезвители аһар туһунан боппуруоһу быһаарарга сорудахтаата. 
«Медицинскэй вытрезвителлэр тустарынан сокуон федеральнай таһымҥа ылыллан турар. Медвытрезвитель үлэтин салайар сөптөөх нормативнай докумуоннары доруобуйа харыстабылын уонна РФ ис дьыалаҕа Министиэристибэлэрэ ылыммыттара. Ити тэрилтэни Дьокуускайга аһар туһунан боппуруоһу быһаараргытыгар көрдөһөбүн», - диэтэ Евгений Григорьев. 
Куорат баһылыга муниципальнай-чааһынай бииргэ үлэлээһини уонна бүддьүөт үбүлээһинин көрөллөрүгэр сорудахтаата. 
«Биһиги сорукпут – асоциальнай элэмиэннэр боппуруостарын быһаарыы буолар. Итирик туруктаах дьон уопсастыбаннай миэстэлэргэ дьону уйгуурдаллар, уопсастыбаҕа уонна бэйэлэригэр сэрэхтээх буолаллар», - диэн баһылык түмүктээтэ.
Санатан эттэххэ, 2020 сыл ахсынньы ыйыгар Судаарыстыбаннай Дума медвытрезвитель систиэмэтин сөргүтэр туһунан федеральнай сокуон ылыммыта.