Евгений Григорьев: «Быйыл даҕаны кыайыыга суоттанабыт»

Бэс ыйын 6-10 күннэригэр Дьокуускай куоракка спорт 29 көрүҥэр 35 улуустан 1700 оҕо кыттыылаах өрөспүүбүлүкэ үөрэнээччилэрин спартакиадата буола турар.
Бэс ыйын 6 күнүгэр Доҕордоһуу болуоссатыгар буолан ааспыт спартакиада үөрүүлээх аһыллыытыгар эдэр спортсменнары куорат баһылыга Евгений Григорьев эҕэрдэлээтэ. 

«Дьокуускай куорат чиэһин көмүскүүр сүүмэрдэммит хамаанданы кытта көрүстүм. Бу барыта куорат таһымнаах спартакиада бастыҥнарыттан сүүмэрдэммит оҕолор. Онон быйыл даҕаны хамаанданан түмүккэ кыайыыга суоттанабыт»,– диэтэ Евгений Григорьев.

Бэлиэтээн эттэххэ, оскуола таһымнаах спартакиадалар Дьокуускай куорат 50 оскуолатыттан 21705 үөрэнээччи кыттыылаах ыытыллыбыттара, куорат таһымнаах – 5100 үөрэнээччи, диэн иһитиннэрэр Олохтоох дьаһалта пресс-сулууспата.