Евгений Григорьев «Биир Ньыгыл Арассыыйа» партия актыыбын кытта көрүстэ

Көрсүһүүгэ СӨ Ил Түмэн Судаарыстыбаннай мунньаҕын уонна Дьокуускай куораттааҕы Дуума дьокутааттара, тэрилтэ салайааччылара, киин куорат ыччата кытыннылар.

Евгений Григорьев ааспыт 2022 сыллааҕы ситиһиилэр уонна үүммүт 2023 сыллааҕы былааннар тустарынан кэпсээтэ. Ол курдук, «Куттала суох уонна хаачыстыбалаах суоллар» национальнай бырайыак чэрчитинэн, 2022 сыллаахха уопсайа 36,3 км усталаах 25 эбийиэк тутуута, саҥалыы уларытан оҥоруута, хапытаалынай өрөмүөнэ ыытылынна, 47 тыһыынча квадратнай миэтэрэ тротуар уурулунна, киэҥ хабааннаах үлэ – Ленин проспегын хапытаалынай өрөмүөнэ ыытыллар. «Прометей» дьоҕус оройуоҥҥа өрөспүүбүлүкэ үрдүнэн саамай улахан, 990 миэстэлээх 39 №-дээх оскуола үлэҕэ киирдэ. 2022 сыл түмүгүнэн 1015 гражданин 346 хаарбах туруктаах дьиэлэртэн көһөрүлүннэ. 326 тыһыынча квадратнай миэтэрэ олорор дьиэ үлэҕэ киирдэ, 34 элбэх кыбартыыралаах дьиэ көтүрүлүннэ.

Былырыын, өрөспүүбүлүкэ былаастарын өйөбүлүнэн, 75 тиэргэн территорията тупсаран оҥоһулунна, 132 оҕо балаһаакката, сквердэр өрөмүөннэннилэр, Кыайыы паарката оҥоһулунна. Итини таһынан, социальнай гаастааһыҥҥа, уу ситимин уонна ууну ыытыы бырайыактааһыныгар, дьэллик кыылларга, көҕөрдүүгэ сыһыаннаах улахан үлэ ыытылынна.

Отчуот кэмигэр куорат баһылыга уопсастыбаннаһы, дьокутааттары кытта бииргэ сомоҕолоһон, Олохтоох дьаһалта өттүттэн ыытыллар алкогольнай бородууксуйаны утары политиканы чопчулаан бэлиэтээтэ.

«Дьокуускай куорат территориятыгар «лже-кафелар» курдук түктэри быһыыны төрдүттэн суох гынар соруктаахпыт. Куорат олохтоохторо алкогольнай бородууксуйанан эргинэр эбийиэктэри аҕыйатарга туруорсаллар, бары уокуруктартан 10 тыһыынчаттан тахса илии баттааһына хомулунна», - диэтэ Евгений Григорьев.

Алкогольнай утахтары атыылааһыны бэрээдэктиир сокуону оҥоруу ирдэнэрин этэн туран, куорат баһылыга Ил Түмэн Судаарыстыбаннай мунньах норуодунай дьокутааттарыттан иккис ааҕыыга СӨ «Об установлении дополнительных ограничений времени, условий и мест розничной продажи алкогольной продукции в РС (Я)» сокуонугар көннөрүүлэри киллэриини өйүүллэригэр уонна ылыналларыгар көрдөстө. Манна даҕатан эттэххэ, көннөрүүлэр бастакы ааҕыыга ылыныллыбыттара.

Евгений Григорьев «Биир Ньыгыл Арассыыйа» партия чилиэннэрин Олохтоох дьаһалта үүммүт 2023 сылга үлэтин былаанын кытта билиһиннэрдэ. Ил Дархан Айсен Николаев «2032 сылга диэри Саха Өрөспүүбүлүкэтин киин куоратын – Дьокуускай куораты сайыннарыы туһунан» уурааҕын чэрчитинэн, социальнай суолталаах соруктары хайысхаларынан олоххо киллэрэр сыал турар: үөрэҕирии, суоллар, тырааныспар, олорор дьиэнэн хааччыйыы, тупсаран оҥоруу, олох-дьаһах хомунаалынай хаһаайыстыбата.

2023 сылга 2464 куорат олохтооҕун 843 кыбартыыраттан көһөрөллөр, 79 хаарбах туруктаах дьиэ көтүрүллэр, көһөрүү бырагырааматын болдьоҕун иннинэ түмүктээһин былааннанар. «Куттала суох уонна хаачыстыбалаах суоллар» национальнай бырайыак олоххо киириитин чэрчитинэн Ленин проспегын хапытаалынай өрөмүөнэ салҕанар, 21 км усталаах массыына суоллара – барыта 28 эбийиэк саҥалыы уларытан оҥоһуллар. Оптуобус пааркатын саҥардыы салҕанар, сылаас тохтобуллары туруоруохтара, саҥа муниципальнай маршрут ситимэ оҥоһуллуоҕа. Итини сэргэ улахан болҕомто тиэргэн территорияларын, Сайсары күөл тула уопсастыбаннай туонаны, сквердэри тупсаран оҥорууга ууруллар. Кыайыы пааркатыгар «Дьокуускай – килбиэннээх үлэ куората» өйдөбүнньүк стела уонна «Патриот» аллея оҥоһуллуохтара.

Отчуот кэнниттэн көрсүһүү кыттыылаахтара куорат баһылыгар ыйытыыларын биэрдилэр. Ол курдук, байыаннай сулууспалаахтарга – анал байыаннай дьайыы кыттыылаахтарыгар сир учаастактарын түҥэтиигэ, былаас уорганнарыгар ыччат интириэһин көмүскээһиҥҥэ, «Кырдьаҕас куорат – 2» бырайыак олоххо киириитигэр сыһыаннааҕы ыйыталастылар. Итини таһынан, киин куоракка партийнай бырайыактарынан Олохтоох дьаһалта үлэтин, инфраструктура тутуутун,  СОНТ- тарга, ол иһигэр «Севернай» дьоҕус оройуоҥҥа тупсаран оҥорууну интириэһиргээтилэр.

Түмүккэ «Биир Ньыгыл Арассыыйа» партия активистара куорат баһылыгар муниципалитет таһаарыылаах үлэтин иһин махтаннылар.