Евгений Григорьев: «Биэрэпиһи ааһыы куорат сайдыытын былааныгар суолталаах»

Алтынньы 15 күнүгэр саҕаламмыт нэһилиэнньэ биэрэпиһэ Дьокуускай олохтоохторугар суолталаах тэрээһин. Ити туһунан куорат баһылыга Евгений Григорьев социальнай ситимнэргэ куорат олохтоохторугар туһаайан эттэ. 
Куорат баһылыга «Госуслуги» портал нөҥүө биэрэпиһи ааспытын туһунан үллэһиннэ уонна ити ньыма табыгастааҕын бэлиэтээтэ. 
«Үлэм кэнниттэн «Госуслуги» (gosuslugi.ru) сайтка 10 мүнүүтэ олорон нэһилиэнньэ биэрэпиһигэр кытынным. Бастакы төгүлүн биэрэпиһи 2002 сыллаахха ааспытым. Ити кэмтэн ыла анкета ыйытыктара улаханнык уларыйбатахтар, толорор ньыма эрэ уларыйбыт – анкетаны биэрэписчиги күүппэккэ, хаһан баҕарар толоруохха сөп», – диэн бэлиэтээтэ Евгений Григорьев.
Баһылык нэһилиэнньэ биэрэпиһин ааһыы куорат сайдар былаанын чопчулуурга суолталааҕын ыйда. 
«Бүтэһик төгүлүн биэрэпис 2010 сыллаахха ыытыллыбыта. Ити кэм тухары элбэх уларыйыы таҕыста. Куораппыт Уһук Илиҥҥэ биир балысханнык улаатар куоратынан буолар. Билигин хас киһи, ханна, хайдах олорорун туһунан чуолкай дааннайдары ылыахпытын наада», – диэн бэлиэтээтэ Евгений Григорьев.
Биэрэпиһи табыгастаахтык уонна куттала суох «Госуслуги» портал нөҥүө алтынньы 15 күнүттэн сэтинньи 8 күнүгэр диэри ааһыахха сөп.