Евгений Григорьев 1 №-дээх Оҕо спортивнай оскуолатын кэлэктиибин эҕэрдэлээтэ

Ахсынньы 28 күнүгэр куорат баһылыга Евгений Григорьев Дьокуускайдааҕы 1 №-дээх Оҕо спортивнай оскуолатын кэлэктиибин 80 сыллаах үбүлүөйдэринэн эҕэрдэлээтэ. Кинини кытта кэлэктииби СӨ физическэй култуураҕа уонна спортка миниистирэ  Иннокентий Григорьев эҕэрдэлээтэ. Бу туһунан Олохтоох дьаһалта пресс-сулууспата иһитиннэрдэ. 
Евгений Григорьев элбэх ахсааннаах оҕо спортивнай өйө-санаата, дьулуура  сайдарыгар оскуола тренер-преподавателлэрин дьоһун оруолларын уонна ураты суолталаах кылааттарын бэлиэтээтэ.
«80 сыл устата 1 №-дээх Оҕо спортивнай оскуолата Саха сирин саамай инники кэккэҕэ сылдьар оскуолата буолла. Преподавателлэр оҕо сайдыытыгар үлэлэрэ, биллэн турар, сүҥкэн суолталаах. Эһиги ииппит эдэр көлүөнэҕит инники өттүгэр куораппытын, өрөспүүбүлүкэбитин уонна дойдубутун сайыннарыаҕа», – диэн бэлиэтээтэ  Евгений Григорьев.
СӨ физическэй култуураҕа уонна спортка миниистирэ  Иннокентий Григорьев ыарахан сэрии кэмигэр, 1942 сыл тохсунньу ыйыгар, Дьокуускайга бастакы оҕо спортивнай оскуолата тэриллибитин санатта.
«Ити даата билигин официальнайдык Саха сиригэр оҕо спорда саҕаламмыт кэминэн ааҕыллар. Бүгүҥҥү күҥҥэ спортивнай оскуолаҕа оҕолор чэпчэки атлетика, баскетбол, гимнастика, буокса уонна этноспорт көрүҥнэрин баһылыыллар», – диэтэ спорт миниистирэ.  
Тыл этээччилэр оскуола иитиллээччилэрин Арассыыйа уонна аан дойду күрэхтэһиилэригэр бэртээхэй көрдөрүүлээхтэрин бэлиэтээтилэр.
Бу күн оскуола чулуу үлэһиттэригэр куорат уонна СӨ судаарыстыбаннай наҕараадаларын туттардылар.