Эти таптааччыларга сонун бүлүүдэлэр

«Кыһыл хайа» салаат

Туох наадата:

буспут ынах этэ – 450 г;

моркуоп – 2 уст.;

сымыыт – 5 уст.;

грецкэй эриэхэ – 70 г;

гранат – 100 г;

майонез – 250 г;

хара мэлиллибит биэрэс, туус – бэйэ сөбүлүүрүнэн.

Астааһына:

Ынах этин, моркуобу, сымыыты (бүтэйдии) туспа иһиккэ буһарабыт. Сойутабыт, онтон сымыыты, моркуобу хахтыыбыт. Гранаты сууйан, туораахтарын ылаттыыбыт. Грецкэй эриэхэни ыраастыыбыт уонна кураанах, итийбит хобордооххо ыһаарылыыбыт, онтон бытархай гына кырбыыбыт. Моркуобу түөркэлиибит. Эти уонна сымыыты кыра гына бысталыыбыт.

Салгыы салаакка аналлаах иһиккэ араҥанан, хайа курдук быһыылаан, өрөһөлүү уурталыыбыт. Бастакы араҥа – эт (аҥаара) уонна моркуоп (аҥаара, сороҕун хаалларабыт), туус табыгынатабыт, майонеһынан сыбыыбыт. Иккис араҥа – сымыыт, кыра туус, эт (ордуга), туус, биэрэс уонна майонез. Үһүс араҥа – моркуоп (ордуга), грецкэй эриэхэ. “Хайабыт” үрдүн майонеһынан сыбыыбыт уонна гранат туорааҕынан киэргэтэбит. Холодильникка туруора түһэр ордук.

Оҕурсулаах, эттээх салаат

Туох наадата:

ынах этэ – 400 г;

маринованнай оҕурсу – 2 уст.;

сибиэһэй оҕурсу – 1 уст.;

сымыыт – 2 уст.;

майонез – 2 ост.нь;

туус – бэйэ сөбүлүүрүнэн.

Астааһына:

Бастаан ынах этин, сымыыты буһаран сойутабыт. Дьиҥэр, эти ыһаарылыахха да сөп, оннук ордук минньигэс буолар. Оҕурсу икки көрүҥүн, сымыыты, эти – барытын кыра гына кырбаан баран, иһиккэ холбуубут, майонезтыыбыт, киэргэтэбит. Холодильникка туруора түһэр ордук.

«Эр киһи баҕа санаата» салаат

Туох наадата:

буспут ынах этэ – 150 г;

кытаанах сыыр – 70 г;

оҕурсу – 1 уст.;

сымыыт – 2 уст.;

эриэппэ луук – 0,5 уст.;

майонез – 2 ост.нь;

туус, хара мэлиллибит биэрэс  – бэйэ сөбүлүүрүнэн;

дьаабылыка уксууһа – 50 мл.

Астааһына:

Эти, сымыыты эрдэ буһаран сойутабыт. Сымыыты ыраастыыбыт, бытархай гына түөркэлиибит. Луугу хаҕын ыраастаан, аҥаардаан баран кубиктыы эбэтэр тиэрбэстии кырбыыбыт. Онтон дириҥ иһиккэ уган, үрдүгэр дьаабылыка уксууһун кутабыт уонна 15-20 мүн. сытыарабыт, онтон сүөкээн кэбиһэбит. Маннык гынан аһыы амтанын минньитэбит. Эти уһун синньигэс гына кырбыыбыт уонна дириҥ иһиккэ ууран, 0,5 ост.нь. майонез кутан булкуйабыт. Сыыры бытархай гына түөркэлээн бэлэмниибит. 

Салгыы салааппытын иһиккэ кутан, араҥанан уурталыыбыт, маныаха араас быһыылаах анал киэби туттуохха сөп. Луукпутугар 0,5 ост.нь. майонез кутан булкуйабыт уонна тэриэлкэҕэ кутабыт. Иккис араҥа – эт. Туспа иһиккэ сымыыт уонна 1 ост.нь. майонез кутан булкуйабыт, бэйэ сөбүлүүрүнэн укуруоп уонна петрушка кырбаан эбиэххэ сөп. Үһүс араҥа – сымыыттаах маасса. Бүтэһик араҥа – түөркэлэммит сыыр. Бэлэм салааты киэргэтэн, остуолга тута ууруҥ.

Бэрт тотоойу уонна минньигэс бүлүүдэнэн хайа баҕарар эр киһи сүрэҕин сүүйүөххэ, ыалдьыттары күндүлүөххэ, бырааһынньыктааҕы сандалыны киэргэтиэххэ сөп.

«Моҕус» салаат

Эмиэ эттээх, олус тотоойу салаат. Норуокка «Обжорка» диэн аатынан биллэр, ону биһиги сахатыттыбыт.

Туох наадата:

ынах этэ – 300 г;

кэриэйдии моркуоп – 200 г;

эриэппэ луук – 1 уст.;

шампиньон (сибиэһэйдии тоҥоруллубут да буолуон сөп)– 400 г;

маринованнай оҕурсу – 2 уст.;

майонез – 80 г;

туус, хара мэлиллибит биэрэс  – бэйэ сөбүлүүрүнэн;

мас арыыта  – 2 ост.нь.

Астааһына:

Сыата суох эти ууга туус кутан буһарабыт, лавр сэбирдэҕин, биэрэс эбиэххэ сөп. Эти буспут уутугар сойутабыт, онтон соломолуу кырбыыбыт. Луугу ыраастаан, аҥаардаан баран тиэрбэстии быһабыт. Шампиньону синньигэс гына кырбыыбыт. Хобордооххо мас арыытын кутан, сылытан баран луукпутун саһарыар диэри сырдьыгынатабыт. Онтон тэллэйи эбэн, уута уолуор диэри ыһаарылыыбыт, туус, биэрэс кутабыт уонна сойутабыт. Маринованнай оҕурсуну соломолуу кырбыыбыт, уутун сүөкүүбүт.

Салгыы иһиккэ барытын –  эти, ыһаарыламмыт тэллэйдээх луугу, оҕурсуну холбуубут, онно кэриэйдии моркуобу эбэбит, майонез кутабыт уонна булкуйабыт. Амсайан көрөн туустуубут.

Остуолга сылаастыы ууруллар эттээх салаат

Туох наадата:

ынах этэ – 300 г;

помидор (черри) – 200 г;

минньигэс  биэрэс – 2 уст. (икки араас өҥнөөх ордук);

кыһыл эриэппэ луук – 1 уст.;

петрушка (эбэтэр атын күөх үүнээйи) – 3 лабаа;

мас арыыта – 2 ост.нь.;

туус, хара мэлиллибит биэрэс  – бэйэ сөбүлүүрүнэн;

дьаабылыка уксууһа – 50 мл.

Туматын бэлэмнииргэ:

оливка арыыта (мас арыыта да буолуон сөп) – 3 ост.нь.;

мүөт – 1 ост. нь.;

хартыыһа – 1 ч.нь.;

хара мэлиллибит биэрэс – бэйэ сөбүлүүрүнэн.

Маринадыгар туох наадата:

дьаабылыка уксууһа – 2 ост.нь.;

саахар – 1 ч.нь.

Астааһына:

Бастаан салаакка туттуллар тумабытын бэлэмниибит. Оливка арыытын, мүөтү, хартыыһаны уонна хара мэлиллибит биэрэһи холбоон, биир кэлим маасса буолуор диэри булкуйабыт.

Луугу аҥаардыыбыт уонна тиэрбэстии быһабыт. Маринадпытын бэлэмниибит: уксууһу уонна саахары холбуубут уонна саахара үчүгэйдик суураллыар диэри булкуйабыт. Онтон луукка кутабыт уонна сытыара түһэбит (маринады салаакка кутуохпут иннинэ хайаан да сүөкүүбүт).

Черри помидору сууйабыт, куурдабыт уонна аҥаардыыбыт. Атын да сортаах помидору кутуохха сөп, оччоҕуна кыра гына кырбыахха наада. 

Болгар биэрэһин сиэмэтиттэн арааран ыраастыыбыт уонна соломолуу бысталыыбыт. Күөх үүнээйини сууйан, куурдан бытархай гына кырбыыбыт.

Эти саамай бүтэһик астыыбыт, тоҕо диэтэххэ салааппыт остуолга сылаастыы ууруллар. Эти бары өттүн мас арыытынан сотобут уонна кураанах, итийбит хобордооххо күүстээх уокка 3-5 мүн.эргитэ сылдьан ыһаарылыыбыт. Онтон бэлэм эти сойуппакка, соломолуу кырбыыбыт.

Дириҥ иһиккэ помидору, болгар биэрэһин, маринадтаммыт луугу холбуубут, онно эти сылаастыы кутан булкуйабыт, күөх үүнээйини эбэбит. Үрдүгэр бэлэм тумабытын кутабыт уонна остуолга тута уурабыт. Олус минньигэс салаат, хайаан да астаан көрүҥ!

Сухариктаах уонна эттээх салаат

Туох наадата:

ынах этэ – 200 г;

пекинскэй хаппыыста – 1 уст.;

сухарик – 100 г;

сымыыт – 2 уст.;

эриэппэ луук – бэйэ сөбүлүүрүнэн;

майонез  – 150 г. 

Астааһына:

Сыата суох эти ууга туус кутан буһарабыт, сойутабыт, онтон уһун синньигэс гына кырбыыбыт. Сымыыты буһаран баран эмиэ итинник быһабыт. Хаппыыстаны сууйан, куурдан баран, сэбирдэхтэрин араарабыт, онтон соломолуу быһабыт. Эриэппэ луугу аҥаардаан, тиэрбэстии кырбаан кутуохха сөп. Барытын салаат иһитигэр кутабыт, майонезтыыбыт, сухарикпытын эбэбит уонна үчүгэйдик булкуйабыт. Бэйэ сөбүлүүрүнэн киэргэтэбит.