Эрэлбитин сүтэрбэппит

Чэпчэки атлетика. “Динамо” стадиоҥҥа буолан ааспыт 100, 400, 3000 м сүүрүүлэргэ, уһуну ойууга, үрдүгү ойууга күрэхтэһиилэр түмүктэринэн Сахабыт сирин сүүмэрдэммит хамаандата миэстэлэспэтэ. Ол оннугар, биһиги үрдүк үөрүүбүтүгэр, 100 м мэһэйдээх сүүрүүгэ Дьокуускай аннынааҕы Табаҕа орто оскуолатын 8 кылааһын үөрэнээччитэ, 1-кы №-дээх оҕо спортоскуолатын иитиллээччитэ, үтүөлээх тренер Петр Нечаевка эрчиллэр Ксения Панова биэтэккэ бастакынан кэлэн, Саха сирин сүүмэрдэммит хамаандатыгар бастакы кыһыл көмүс мэтээли аҕалла.

Харбааһын. Владивистокка буола турар оонньууларга Сахабыт сирин оҕолоро кытаанах тургутууну ааһаллар. Харбааһыҥҥа маҥнайгы мэтээл үөрүүтүн Дьокуускай “Чолбон” бассейныгар эрчиллэр Владислав Адасько аҕалла.

Баскетбол. “3х3” баскетболга киин регионнар оҕолоро ордук бэлэмнээхтэр. Алина Курбанова, Анастасия Нужина, Анастасия Красноштанова, Дарья Соколова састааптаах хамаандабыт Сибиир хамаандатыгар 21:0 хоттордулар. Роман Смирнов, Мирослав Игнатенко, Илья Черников, Владислав Малиноскай Кыргызстан уолаттарыгар уонна Сибиир хамаандаларыгар хоттордулар. Баскетболга Сибиир, Урал, Узбекистан хамаандалара үчүгэйдэр.

Уус-уран гимнастикаҕа Москва, Сибиир, Татарстан хамаандалара толоруу техникатыгар, хамсаныы динамикатыгар, артыыстааһыҥҥа ордуктар. Биһиги Зарина Борисовабыт уонна Дарья Христофоровабыт обруч диэн предметтэрин мүччү тутаннар, 4 уонна 6 миэстэлэргэ тигистилэр. Ол оннугар Сахабыт сирин гимнасткалара бэһиэ буолан, төһө да миэстэҕэ тиксибэтэллэр, Москва, Казань, Омскай курдук сайдыылаах куораттары кытта дьоһуннук күрэхтэстилэр. Икки мүнүүтэлээх “Ягода-малинка” диэн ырыа сахалыы матыыбынан мээчиктээх хамсаныылары тэбис-тэҥҥэ, кыраһыабайдык толорон, мэтээл иһин киирсэр быраабы ылбыттара ситиһии быһыытынан сыаналаныан сөп.

Кумах волейбола (тренер Айсен Жерготов) болҕомтону тарта. Уолаттарга Намтан сылдьар Айдын Гуляев уонна Эдуард Слепцов Киргизия хамаандатын хотон баран, Приморье уонна Сибиир хамаандаларыгар баһыйтардылар. Кыргыттарбыт Динара Емельянова уонна Анжелика Павлова сытыы, тэҥ оонньууга Кыргызстан хамаандатын 2:1 кыайан баран, Армения, Сибиир, Приморье хамаандаларыгар баһыйтардылар.

Остуол тенниһигэр (тренер Аркадий Иванов) Арсен Аржаков, Владимир Печкуров, Диана Пахомова, Анастасия Исакова оонньообуттарыттан ордук Диана Пахомова табыллан оонньоон, финальнай сеткаҕа кииристэ.

Тхэквондоҕа (тренер Яков Филиппов) эмиэ кытаанах тургутуу буолла. Бу сэдэх уонна олус интэриэһинэй көрүҥҥэ додян диэн ааттанар түөрт муннуктаах көбүөргэ илиинэн-атаҕынан охсон-тэбэн киирсиилэри, төбөҕө, корпуска, атахха табыылары компьютер ааҕар. Саха сирин хамаандатыттан 48 кг Николай Жуков, 55 кг Андрей Лисинецкэй, 63 кг Александр Прокопчук хотторуу хомолтотун биллилэр.

Греко-римскэй тустууга (тренер Матвей Матвеев) эмиэ биир дэ мэтээл кэлбэтэ.

Көҥүл тустууга кыргыттарбыт (тренер Александр Птицын) бэрт сэргэх хапсыһыылары көрдөрдүлэр. 39 кг Жанна Докторова, 46 кг Амелия Лаптева үрүҥ көмүс мэтээллэри ылаттаатылар.

Атах оонньууларыгар “кылыыга” икки мэтээл кэллэ. Саха сирин кылыыһыта Өлүөхүмэттэн Данил Воеводин эккирэтэн көрдө да, ыранан тиийбэтэ. 40 м 51 см түһэн, иккис көрдөрүүлэннэ. Саха сирин өссө биир ойооччута Дьокуускайтан Валентин Васильев 37 м көрдөрүүлээх үһүс бириистээх миэстэлэннэ. Кыргыттарга Приморье, Сибиир кыргыттара инники күөҥҥэ сырыттылар. Төрөлкөй уҥуохтаах, эт-сиин өттүнэн сайдыылаах Сибиир уола Руслан Праздницын кылыыга кыһыл көмүс мэтээл хаһаайына буолла. Ыстаҥаҕа эмиэ Руслан Праздницын 39 м 36 см көрдөрүүлээх бастаата. Өлүөхүмэ ыччата Данил Володин – иккис, Дьокуускай куораттан Валентин Васильев үһүс миэстэлэри ылаттаатылар. Кыргыттарга Мииринэй куораттан Ксения Качевская иккис буолла.

Мини-футболга уолаттарбыт Узбекистан хамаандатын 3:0 кыайдылар. Бу иннинэ Уһук Илин хамаандатын 6:1 хоппуттара. Онон футболистарбыт саҕалааһыннара үчүгэй.

Түөрт күн түмүгүнэн Москва куорат 21 кыһыл көмүс мэтээллээх бастаан иһэр, Сибиир – 21, Урал – 14. Саха сирин хамаандата биир кыһыл көмүс, биэс үрүҥ көмүс уонна үс боруонса мэтээллэрдээх ахсыс көрдөрүүлээх.

Күрэхтэһиилэр салҕаналлар