“ЭпиВакКоронаны” биэрии саҕаланна

Ахсынньы 28 күнүгэр, медицина эйгэтин уонна Роспотребнадзор үлэһиттэригэр «ЭпиВакКорона» вакцинанан быһыыны оҥоруу саҕаланна.

Быһыыны 3-с №-дээх Дьокуускай куорат балыыһатын медиктэрэ номнуо ыллылар. Маны таһынан Дьокуускай куорат балыыһаларын 34 тэрилтэтигэр быһыыны оҥорор кабинеттари тэрийэн үлэлэттилэр.

«ЭпиВакКорона» вакцинанан 18-тан 60-гар диэри саастаах, хроническай ыарыыта суох дьоҥҥо быһыыны оҥороллор. Быһыы иккис түһүмэҕэ икки-үс нэдиэлэнэн оҥоһуллар. Вакцинаны харайыы уонна тиэйии усулуобуйата, атыттарга тэҥнээтэххэ, судургу соҕус диэн медиктэр бэлиэтииллэр.

Ахсынньы 24 күнүгэр «Вектор» киин оҥорон таһаарбыт 1,2 тыһыынча доза вакцината өрөспүүбүлүкэҕэ кэлбитин Доруобуйа харыстабылын министиэристибэтэ иһитиннэрэр.