Электроннай полис Судаарыстыбаннай өҥөлөргө баар буолла

Пластиковай эбэтэр кумааҕы полистары илдьэ сылдьар наадата суох буолла. Ирдэнэр буоллаҕына, электроннай докумуону төлөпүөн экраныгар көрдөрүөххэ сөп, бырааска онлайн көрүҥүнэн суруттарарга полис тус кэбиниэттэн автоматическайдык көстөр.

Судаарыстыбаннай өҥөлөргө киирэн оҥотторорго регистрация эрэ наада. Тус кэбиниэккэ полис нүөмэрэ баар буоллаҕына, цифровой докумуон автоматическай көрүҥүнэн киирэр. Полиһа суохтар, электроннайы оҥотторор курдук, сайабылыанньа суруйаллар. Биир үлэ күнүн иһинэн бэлэм буолар. Оҕолор полистарын оҥотторорго төрөөбүтүн туһунан туоһу сурук дааннайдара наада.

Электроннай полиһынан туттар табыгастаах. Полис дааннайдара, нүөмэрэ, страховой хампаанньа хантаактара уонна киһи ханнык поликлиникаҕа сыһыарыллыбыта тус кэбиниэккэ баар буолар.

Ирдэнэр буоллаҕына, страховой хампаанньаны, региону уларытыахха уонна полис үлэтин тохтотуохха, эбэтэр сөргүтүөххэ сөп.