Электроннай үлэ киниискэтин туһаныы сокуонунан бигэргэннэ
2021 сыл тохсунньу 1 күнүттэн үлэ киниискэтэ электроннай көрүҥҥэ көһөрүллэрин туһунан РФ бырабыыталыстыбатын пресс-сулууспата иһитиннэрэр.
Бырабыыталыстыба бэрэссэдээтэлэ Михаил Мишустин уларыйыыны бигэргэттэ. Үлэ киниискэтин электроннай көрүҥэ кумааҕы киниискэттэн атына суох. Үлэһит туһунан информация, үлэ миэстэтэ, үлэҕэ ылыы, ууратыы, уурайыы биричитиинэтэ ыйыллар.
Электроннай киниискэни судаарыстыбаннай өҥө порталын нөҥүө уонна биэнсийэ пуондатын төлөпүөҥҥэ аналлаах сыһыарыытыгар киирэн көрүөххэ сөп. Ону таһынан электроннай киниискэттэн информацияны биэнсийэ пуондатыттан эбэтэр МФЦ-тан кумааҕынан ылыахха сөп.
Алтынньы 31 күнүгэр диэри салайааччы үлэһиттэригэр кумааҕы эбэтэр электроннай үлэ киниискэтин талыан сөбүн тиэрдэрэ ирдэнэр.
Электроннай үлэ киниискэтин талар түгэҥҥэ, кумааҕы киниискэни үлэһиккэ бэйэтигэр бэриллэр. Ол эрэн үлэ туһунан сибидиэнньэ 2020 сылтан саҕалаан бэлиэтэнэр. Онон кумааҕы үлэ киниискэтин илдьэ сылдьар наада.
Кумааҕы үлэ киниискэтин талар түгэҥҥэ, салайааччы үлэ туһунан информацияны электроннай көрүҥүн тэҥинэн толорор. Электроннай көрүҥҥэ 2021 сыл кэнниттэн көһүөххэ сөп. Анал сайабылыанньа суруллубатаҕына уларыйбат. Онтон 2021 сыл кэнниттэн үлэҕэ киирэргэ киниискэ көрүҥэ электроннай эрэ буолар.
Сонуннар
Ордук ааҕаллар
