Элбэх оҕолоохторго уларыйыы

От ыйын 16 күнүгэр “Элбэх оҕолоох ыалларга аналлаах түөскэ анньынар бэлиэни туттарыы туһунан”  2013 сыллаахха от ыйын 5 күнүгэр тахсыбыт СӨ Бэрэсидьиэнин Ыйааҕыгар уларыйыылары киллэрии туһунан” CӨ Ил Дарханын 1329 №-дээх Ыйааҕа таҕыста.

Туох уларыйыы киирдэ диэн интэриэһиргиир буоллаххытына:

• Өскөтүн 18-тан 23-гэр диэри саастаах биир эмэ оҕоҕут орто эбэтэр үрдүк үөрэх кыһатыгар үөрэнэр буоллаҕына, дастабырыанньаҕыт  сылга биирдэ уһуур (бу иннинэ сылга иккитэ уһатыахха наада этэ).
• Өҥө оҥоһуллар болдьоҕо кылгаата: 10-тан 20 үлэ күнүгэр диэри (сибидиэнньэ хайдах киирэриттэн тутулуктаах).
• Ийэлээх аҕаҕа иккиэннэригэр биир экземпляр. Дастабырыанньа урут ийэҕэ эрэ бэриллэр эбит буоллаҕына, мантан ыла үс уонна онтон элбэх оҕолоох сокуонунан ыал буолбут дьоҥҥо иккиэннэригэр эбэтэр соҕотох төрөппүккэ  туттарыллар буолуоҕа. От ыйын 16 күнүгэр диэри туттарыллыбыт дастабырыанньалар дьиҥнээҕинэн ааҕыллаллар.

Санатар буоллахха, бу өҥөнү оҥорор “Мои документы” Киин үлэтэ тохтотуллан турар. Өҥөнү хаһааҥҥыттан ылалларын туһунан mfcsakha.ru биллэрии тахсыаҕа.