Элбэх оҕолоох ийэлэр II-с форумнара ыытылынна

Бүтүн Арассыыйатааҕы Ийэ күнүгэр анаммыт элбэх оҕолоох ийэлэр II-с форумнара «Үлэ кыбаартала» креативнай кластерга ыытылынна. Форумҥа  Дьокуускай дьахталларын хамсааһынын көхтөөх чилиэннэрэ уонна Олохтоох дьаһалта бэрэстэбиитэллэрэ кытыннылар. Тэрээһини СӨ Ил Түмэн Судаарыстыбаннай мунньаҕын сис хамыыһыйатын бэрэссэдээтэлэ Алена Атласова арыйда. Куорат баһылыгын социальнай боппуруостарга солбуйааччы Наталья Степанова форум кыттааччыларыгар эҕэрдэ тылын тириэртэ.

«Маннык үтүө, социальнай эппиэтинэстээх ийэлэр холобурдара баар буолан аан дойду тупсан иһэр!», – диэн санаатын үллэһиннэ Наталья Степанова.

Форум чэрчитинэн, «Чудо блюдо!» кулинарнай куонкурус, дьиэ кэргэҥҥэ анаммыт квиз, БАЦЗЫ астролога Вера Аюми 2024 сыллааҕы билгэтэ, «Моя супермама!» оҕолор уруһуйдарын күрэҕэ ыытылынна, «Полоскун» эко-маҕаһыын спонсордаата.

Итини таһынан, «Боди лайн» фитнес-кулууп салайааччыта Гаврил Винокуров сөпкө аһааһын туһунан кэпсээтэ.

Көрсүһүү түмүгүнэн Сэбиэт көхтөөх чилиэннэригэр махтал суруктары уонна бочуоттаах грамоталары туттардылар.