Элбэх кыбартыыралаах дьиэҕэ бөҕөргөтөр-чөлүгэр түһэрэр үлэ ыытыллыаҕа

Дьокуускайга 50 сыл анараа өттүгэр тутуллубут Ленин пр. 11 элбэх кыбартыыралаах дьиэ истиэнэтин бөҕөргөтөр-чөлүгэр түһэрэр үлэ ыытыллыаҕа уонна сэтинньи ыйыгар диэри түмүктэниэҕэ. Өрөмүөн Дьокуускай куорат Уокуруктааҕы дьаһалтатын Резервэтин пуондатыттан үбүлэнэр. Бу туһунан куорат баһылыгын территориялары сайыннарыыга бастакы солбуйааччыта Алексей Корнилов иһитиннэрбит. 
Элбэх кыбартыыралаах дьиэ истиэнэтин бөҕөргөтөр-чөлүгэр түһэрэр үлэ киин куорат Уокуруктааҕы дьаһалтатын уонна баһылыгын Евгений Григорьев ураты хонтуруолугар сылдьар. 
«Дьиэ деформацияламмыта бэлиэтэммит күнүттэн ураты хонтуруолга сылдьар. Бүгүҥҥү күҥҥэ истиэнэтэ сууллар кутталлаах, ол иһин билигин сүрүн сорукпут – истиэнэни бөҕөргөтүү», – диэн бэлиэтээтэ  Алексей Корнилов. «ЯкутПНИИС» АУо оҥорбут бырайыага бу күннэргэ бэлэм буолар. 
«Департамент жилищных отношений» МХТ дириэктэрэ Мария Павлова иһитиннэрбитинэн, дьиэҕэ 189 гражданин регистрацияламмыт. Ити тэрилтэ үлэһиттэрэ салайар хампаанньа бэрэстэбиитэллэрин кытта кыбартыыралары кэрийэн көрбүттэр, олохтоохторго кылгас болдьоххо тахсалларын курдук сэрэтиини туттарбыттар, барытын быһаарбыттар. Өрөмүөн кэмигэр ханна да барар сирдэрэ суох дьону маневреннай пуондаҕа олордорго бэлэмнэр.  Бэлиэтээн эттэххэ, РФ Олох-Дьаһах кодексатыгар олоҕуран, ыксаллаах быһыы-майгы усулуобуйатыгар олохтоохторго өрөмүөн үлэтэ бүтүөр диэри маневреннай пуондаҕа олорор быраап баар. 
Куорат баһылыга Евгений Григорьев 1990 сылга диэри тутуллубут таас дьиэлэри барыларын бэрэбиэркэлииргэ сорудахтаабыт.