Элбэх кыбартыыралаах дьиэҕэ бөҕөргөтөр-чөлүгэр түһэрэр үлэ түмүктэнэр

Киин куорат Ленин проспегын 11 №-гэр баар элбэх кыбартыыралаах дьиэ истиэнэтин бөҕөргөтөр-чөлүгэр түһэрэр үлэ түмүктэнэн эрэр. Ол туһунан Уокуруктааҕы дьаһалта пресс-сулууспата иһитиннэрдэ.

Олохтоохтор быһа холоон сэтинньи 16-17 күннэригэр кыбартыыраларыгар төннүөхтэрин сөп. Ити туһунан дьиэ өрөмүөнүн бэрэбиэркэлээһиҥҥэ куорат баһылыга Евгений Григорьевка «Главстрой» МХТ дириэктэрин хапытаалынай тутууга солбуйааччы Василий Румянцев иһитиннэрдэ.
Бүгүҥҥү күҥҥэ «Сантехстрой 2008» ХЭТ таһынааҕы истиэнэни уонна ситэрэр, тупсарар үлэни оҥорор.
Ыытыллыбыт чинчийии түмүгүнэн «ЯкутПНИИС» АУо бэрэстэбиитэллэрэ дьиэ сууллар куттала суох диэбиттэр. Экспертэр уҥа истиэнэни тутар эркини ортонон сыаналаабыттар уонна акылаат түһүүтүн бэлиэтээбиттэр.
«Өрөмүөн уҥа истиэнэҕэ хайдыбыт өттүттэн саҕалаан оҥоһулунна, акылааты тыыппатыбыт. Кирпииччэ ууну оборор, дьиэ анныгар уу мустар, ол иһин сиик бастакы этээс сорох кирпииччэлэрин алдьаппыт, эркин үс аҥыы арахсыбыт. Быйыл интституппут таһынааҕы истиэнэни, дьиэ сарайын уонна акылаатын чинчийиэҕэ», – диэтэ «ЯкутПНИИС» АУо бырайыактыыр салаатын кылаабынай инженерэ Наталья Семенова.
Евгений Григорьев олохтоохторго уонна «Модуль сервис» ХЭТ Салайар хампаанньаҕа истиэнэҕэ алдьанарын хонтуруоллуур курдук тутуу маячоктарын туруорарга сүбэлээтэ. Баһылык бэлиэтээбитинэн, кэлэр сылга манна элбэх кыбартыыралаах дьиэлэргэ хапытаалынай өрөмүөнү ыытар Пуонда үлэлиирэ былааннаммыт.
Санатар буоллахха, элбэх кыбартыыралаах дьиэ истиэнэтин бөҕөргөтөр-чөлүгэр түһэрэр үлэ саҕаланыаҕыттан киин куорат Уокуруктааҕы дьаһалтатын уонна баһылыгын Евгений Григорьев ураты хонтуруолугар сылдьар.