Элбэх үбүлүөйдээх Национальнай бэчээт күнэ киэҥник бэлиэтэниэ

Кулун тутар 17 күнүгэр Ил Дархан ыйааҕынан быйылгы элбэх үбүлүөйдээх Национальнай бэчээт күнэ киэҥник бэлиэтэнэр дьаһала тахсыбыта, тэрийэр кэмитиэт испииһэгэ оҥоһуллубута. Онон элбэх тэрээһин ыытыллыахтаах. Бу туһунан бэҕэһээ Суруналыыстар сойуустарын көҕүлээһининэн өрөспүүбүлүкэтээҕи медиа-кииҥҥэ буолбут төгүрүк остуолга ирэ-хоро кэпсэтии буолла. 
Быйыл сахалыы бастакы хаһыат тахсыбыта 100 сылын туолуоҕа. Дьокуускайга типография үлэтин саҕалаабыта 160 сылын бэлиэтиибит. Уруккута “Бичик” кинигэ кыһата, билиҥҥитэ “Айар” акционернай уопсастыба буолбут тэрилтэ кинигэлэри таһааран саҕалаабыта 90 сыла буолар. Итинэн элбэх үлэ барыаҕа. Телевидениеҕэ документальнай хроника, кинигэлэр оҥоһуллуохтара. Сотору бэчээт бэтэрээннэрин Намҥа, М.К. Аммосов аатынан Судаарыстыбаннас музейыгар десаҥҥа ыытыахтара. Оттон сайын Исидор Барахов төрөөбүт дойдутугар, Үөһээ Бүлүү Харбалааҕар таарыччы от күүлэйигэр үлэлии сылдьар суруналыыстары илдьэр былаан баар.  
Ити туһунан мустубут дьоҥҥо Суруналыыстар сойуустарын бэрэссэдээтэлэ Г.А. Бочкарева, СӨ Инновацияҕа, цифровой сайдыытыгар уонна инфокоммуникационнай технологияларыгар министиэристибэтин бэрэстэбиитэлэ Станислав Пантелеймонович Софронов сиһилии кэпсээтилэр. Кинилэр “Земскэй суруналыыс” диэн сокуон бырайыагын биһиги кэллиэгэбит М.Н. Христофорова Ил Түмэҥҥэ тиһэҕэр диэри туруоруста, кумааҕы бэчээт тыыннаах хааларыгар үгүс үлэни ыытта диэтилэр.  
Урукку өттүгэр “Манчаары” хаһыаты салҕааччы аатын ыларга былдьаһыы баара. Итинник арахсыбакка, бары бииргэ сомоҕолоһон, айымньылаахтык үлэлииргэ ыҥырдылар.  
Маны таһынан ыам ыйын 1 күнүттэн “Уһун Дьурантаайы-2021” куонкурус биллэриллэрин иһитиннэрдилэр. Бэс ыйын 1 күнүгэр диэри ааптардартан үстүү үлэни ылаллар. Национальнай бэчээт күнүгэр аналлаах тэрээһин, дьаҥ-дьаһах мэһэйдээбэтэҕинэ, “Үс Хатыҥ” ытык сиригэр ыытыллыаҕа.  
Сыл бүтүүтэ үөһэ этиллибит үбүлүөйдэри холбоон, Национальнай бэчээт күнүн Опера уонна балет театрыгар бэлиэтиир былаан баар.