Екатерина Безрученко: «Тутуллубут дьэллик ыттар аҥаардара хаһаайыннаахтар»

Уокуруктаа5ы дьаһалта пресс-сулууспатын информациятынан, ити туһунан «Помоги выжить» Аһымал пуонда дириэктэрэ Екатерина Безрученко дьэллик кыыллары тутар үлэни күүһүрдэр суһал штаб мунньаҕар иһитиннэрбит. 
Пуонда информациятынан, ахсынньы 7 күнүгэр 34 ыт тутуллубут, олортон 2 ыты хаһаайыттара кэлэн ылбыттар, ахсынньы 8 күнүгэр 30 ыт тутуллубут, олор истэригэр 3 ыт хаһаайыннаах, ахсынньы 9 күнүгэр 19 тиэргэн иһинээҕи ыт тутуллубут. 
«Бүгүҥҥү күҥҥэ быстах кэмҥэ тутар Пууҥҥа 800-чэ кыыл баар. Билиҥҥитэ саҥа кыылларга миэстэ тиийэр. Бу күннэргэ биир да ыты таһаарбатыбыт. Билигин элбэх киһи кэлэн ыттары илдьэ барар. Салгыы итинник буоллаҕына ыттары пуунтан таһаартаабаппыт. Холобур, ахсынньы 8 күнүгэр 12 улахан ыты ыллылар, ахсынньы 9 күнүгэр – 5 ыты», – диэн иһитиннэрбит  Екатерина Безрученко. Дьэллик ыттары тутуу үлэтэ күүһүрбүт, ити хайысханан 4 биригээдэ үлэлиир. 
«Куорат хаһаайыстыбатын үлэлэтэр сулууспа» МХТ дириэктэрэ Айаал Егинов СӨ ветеринариятын Департаменыгар, хонтуруоллуур уорган быһыытынан хаһаайыттары кытта үлэлэһэн, ыттарын босхо ыыппаттарын курдук суругунан сэрэтии биэрэр туһунан этиини киллэрбит.  
«Билигин хаһаайыннаах эрээри регистрацията суох ыттар босхо сылдьар кыһалҕалара сытыытык турар. Дьэллик ыттары тутуу күүһүрдүллүбүт эрэсииминэн ыытыллар. Ити курдук, өрөспүүбүлүкэ ветеринарияҕа Департамена ыттаах хаһаайыттарга испэсэлииһи ыытан сэрэтии суругу биэриэн уонна быстах тутар Пууҥҥа тутуллубут хаһаайыннаах ыттары учуоттаан наада», – диэн бэлиэтээбит Айаал Егинов.