Егор Филиппов – «Дыгын оонньуулара - 2021» кыайыылааҕа

Бэс ыйын 27 күнүгэр Н.Н.Тарскай аатынан «Туймаада» стадиоҥҥа ыһыах спортивнай күрэхтэһиилэрэ – «Дыгын оонньуулара - 2021» түмүктэннэ.
Икки күннээх эрийсиилээх күрэхтэһиигэ 12 күүстээх спортсмен сэттэ национальнай көрүҥҥэ күөн былдьастылар. Түмүккэ, төһө да эчэйиини ыллар, күүстээх санаатын, кыайыыга дьулуурун көрдөрөн Хаҥалас улууһуттан Егор Филиппов бэһис төгүлүн кыайыыны ситистэ. Киниэхэ сүрүн бирииһи – 1 мөлүйүөн солкуобай харчыны туттардылар. Күрэхтэһии спонсора – «Прогресс” тутуу хампаанньата (генеральнай дириэктэр Алексей Пинигин).
Үрүҥ көмүс мэтээлгэ Тааттаттан Николай Матаннанов, боруонсаҕа Горнай улууһуттан  Дьулустаан Ноговицын тигистилэр. 
Күрэхтэһии бастакы күнүгэр спортсменнэр национальнай көрүҥнэргэ – «Үс төгүл үс» кылыыга, «Ыстаҥаҕа»,  «Куобахха»,  «Тутум эргииргэ» уонна «Мас тардыһыытыгар» күрэхтэстилэр. 
Маҥнайгы күн түмүгүнэн, национальнай ыстаҥаларга бастакы миэстэни Егор Филиппов ылбыта, иккискэ – Николай Матаннанов, үһүскэ – Вячеслав Дьяконов тиксибиттэрэ.  
«Тутум эргииргэ» кыайыылааҕынан Вячеслав Дьяконов тахсыбыта, иккискэ – Никита Новгородов, үһүс миэстэҕэ Павел Друзьянов тиксибитэ.
«Мас тардыһыыга» Дьулустаан Ноговицын кыайыыны ситиспит, иккис миэстэҕэ Никита Новгородов тахсыбыт, үһүскэ – Николай Матаннанов. Бу көрүҥҥэ Егор Филиппов эчэйиини ылан күрэхтэһиини тохтоторго күһэллибит. 

Күрэхтэһии иккис күнүгэр ох саанан ытыыга куоталаспыттар. Бу көрүҥҥэ Дьулустан Ноговицын тэҥнээҕин булбатах, иккис миэстэҕэ Айсен Елисеев тиксибит, үһүскэ – Егор Филиппов.
400 м. сүүрүүгэ Тимофей Большаков кыайыыны ситиспит. Иккискэ Леонид Филиппов тахсыбыт, кини «Дыгын оонньуулара-2020» кыайыылааҕа. Үһүс миэстэҕэ Вячеслав Дьяконов тиксибит.
Хапсаҕайга Егор Филиппов бастаабыт, иккис миэстэҕэ – Владимир Федоров, үһүскэ – Вячеслав Дьяконов.
«Тааһы көтөҕүүгэ» Дьулустан Ноговицын кыайыылааҕынан тахсыбыт. Иккискэ – Егор Филиппов, үһүскэ – Николай Матаннанов.
Икки күннээх күрэхтэһии түмүгүнэн Егор Филиппов бэһис төгүлүн Дыгын оонньууларын чемпионун үрдүк аатын ылары ситистэ.
Кыайыылааҕы куорат баһылыга Евгений Григорьев эҕэрдэлээтэ. «Егор биһиэхэ барыбытыгар дьиҥнээх күүһү, кыайыыга дьулууру, дьиҥнээх саха боотура хайдах буолуохтааҕын көрдөрдө. Икки күннээх саха спордун өрөгөйүн иһин бары спортсменнэргэ, тренердэргэ уонна тэрийээччилэргэ махтал буоллун», - диэн Инстаграм сирэйигэр Евгений Григорьев суруйар.