«Эдэр суруйааччылар мастарыскыайдара» бырайыакка ыҥыраллар

Суруйааччылар уонна бэчээттээн таһаарааччылар сойуустарын ассоциацията (АСПИ)  Ураалга, Сибииргэ уонна Уһук Илиҥҥи федеральнай уокурукка «Эдэр суруйааччылар мастарыскыайдара» бырайыак саҕаламмытын туһунан иһитиннэрэр.
Бырайыак бэйэтин кыаҕын көрдөрүөн, киэҥ араҥаҕа тахсыан баҕарар айар ыччаты өйүүргэ туһуламмыт. Көрсүһэр миэстэнэн Екатеринбург куорат талыллыбыт, манна киэҥ сири түмэр бырайыак иккис балаһаакката буолуохтаах. 
2022 сыл от ыйын 15 күнүттэн 19 күнүгэр диэри куорат сүрүн култуурунай балаһааккаларыгар лекциялар, маастар-кылаастар уонна аһаҕас дискуссиялар буолуохтара. Проза, поэзия, кириитикэ уонна публицистика, драматургия, оҕо литературата – ити хайысхаларынан эдэр суруйааччылар үлэлэрин биллиилээх суруйааччылар көрүөхтэрэ, киэҥ далааһыннаах бырагыраама чэрчитинэн кыттааччылар бэйэ-бэйэлэрин кытта билсиэхтэрэ.  Тэрээһиннэргэ бэчээттээн таһаарар дьыаланы саҕалыырга, сценарий суруйарга үөрэтиэхтэрэ, кыттааччылар блогер быһыытынан холонон көрүөхтэрэ уонна халыҥ сурунаал нүөмэрин концепциятын оҥоруохтара. Саамай кэрэхсэбиллээх үлэлэр АСПИ партнердарын хомуурунньугар уонна литературнай - уус-уран таһаарыытыгар киириэхтэрэ. 
Куонкуруска Ураал, Сибиир уонна Уһук Илиҥҥи федеральнай уокурук 18-тан 35 саастарыгар диэри олохтоохторо кыттыахтарын сөп. 
Онлайн-сайаапканы уонна литературнай үлэлэри АСПИ официальнай сайтыгар https://aspirf.ru/  2022 сыл муус устар 11 күнүттэн бэс ыйын 1 күнүгэр диэри ыытыллар. 
Экспертнэй хамыыһыйаҕа Арассыыйа суруйууччыларын сойууһун, ону сэргэ Москва уонна Санкт-Петербург суруйааччыларын сойуустарын бэрэстэбиитэллэрэ бааллар, кинилэр 50 бастыҥ айымньы ааптардарын талыахтара. Талыллыбыт суруйааччылар «Эдэр суруйааччылар мастарыскыайдара. Екатеринбург» бырайыакка кыттыахтара.