Эбии күҥҥэ 400-тэн тахса үөрэнээччи кытынна

Быйыл оскуоланы бүтэрэр өрөспүүбүлүкэ 400-тэн тахса үөрэнээччитэ түмүктүүр өйтөн суруйууну (аахпыттан суруйууну) эбии бэриллибит күҥҥэ туттарда. Ол курдук, бэҕэһээ сүрүн болдьоххо, ол эбэтэр муус устар 15 күнүгэр ыытыллыбыт түһүмэххэ «зачет» ылбатах эбэтэр ол күн кэккэ биричиинэнэн кыайан кэлбэтэх, сорудаҕы толорботох үөрэнээччилэр суруйдулар. 
Бу үлэ “зачет/незачет” систиэмэнэн сыаналанар уонна 11 кылаас үөрэнээччилэригэр судаарыстыбаннай түмүктүүр аттестацияҕа көҥүл биэрэр. 
Түмүктүүр өйтөн суруйуу 250 тылтан, оттон аахпыттан суруйуу 200 тылтан  итэҕэһэ суох буолуохтаахтар. 
Оҕолор сорудаҕы 3 чаас 55 мүнүүтэ толордулар. Доруобуйаларыгар хааччахтаах, инбэлиит оҕолорго бу болдьох 1,5 чаас уһатыллан биэрдэ диэн үөрэх министиэристибэтин пресс-сулууспата иһитиннэрдэ.
Өссө биир эбии күн ыам ыйын 19 күнүгэр буолуохтаах. Түмүк ыам ыйын 20 күнүн ааспакка биллиэхтээх.