Эбии 7 пааматынньык Арассыыйа биир кэлим реестригэр киирэр буолла

2024 сыл бастакы аҥаарыгар Арассыыйа норуоттарын култуурунай нэһилиэстибэтин эбийиэктэрин биир кэлим судаарыстыбаннай реестригэр киллэрэргэ 7 пааматынньык докумуона бэлэмнэннэ. Ол туһунан СӨ култуура нэһилиэстибэтин харыстабылга управлениетыгар иһитиннэрэллэр.
Манна Дьокуускайга атыыһыт И.В. Мигалкин дьиэтэ уонна ампаара, Уус Алдаҥҥа П.А. Алексеев-Бөтүрүүсэ уһаайбата, Горнайга норуот суруйааччылара Сэмэн, Софрон Даниловтар, норуот худуоһунньуга Афанасий Осипов, норуот ырыаһыта Мария Варламова төрөөбүт-үөскээбит алаастара о.д.а. киирсэллэр. 
Ону таһынан олунньу ыйга Арассыыйа култууратын министиэристибэтигэр Дьокуускай Сайсары күөлүн киллэрэр туһунан сурук ыытыллыбат. 
Саҥа булуллубут эбийиэктэргэ итини сэргэ Тааттаҕа баар Амыдай сирэ уонна Өлүөхүмэҕэ Кыайыы сэргэтэ киирсэллэр. 
Ити кудук сыл бастакы аҥаарыгар өрөспүүбүлүкэ таһымнаах 9 ордук харыстанар эбийиэк бигэргэтиллибит буоллаҕына, сыл иккис аҥаарыгар 10 бырайыак бигэргэтиллэрэ күүтүллэр. 
Оттон быйыл Дьокуускай куоракка Семен Дежнев уонна Абакаяда, Петр Бекетов, А.Е. Кулаковскай, Комсомолецтар пааматынньыктара уонна Короленко уулуссатыгар турар Аэрогеодезическэй тэрилтэ иһигэр баар өйдөбүнньүк өрөмүөннэннилэр. 
Дьокуускайга Ленин пааматынньыгын уонна Покровскайга Орджоникидзе дьиэтин өрөмүөннэрэ салҕанар.
Итини сэргэ Дьокуускайга Троицкай Собор, митрополит Иннокентий Вениаминов уонна Мииринэй куоракка «Мир» трубка өрөмүөннэрин бырайыага оҥоһуллар.
Каландаришвили уонна Марк Жирков уулуссаларын оройуоннарыгар 2 тыһ.кв.м иэннээх сиргэ киэҥ хабааннаах археологическай хаһыылар бара тураллар.
Санатар буоллахха, Саха АССР 100 сылын бэлиэтээһин чэрчитинэн өрөспүүбүлүкэ баһылыга Айсен Николаев «Сохраним памятники» диэн бырайыагы көҕүлээбитэ. Бу бырайыагынан өрөспүүбүлүкэ араас муннугар уопсастыбанньыктар күүстэринэн 40-ча пааматынньык чөлүгэр түһэрилиннэ, үлэ салҕанар.
Официальнай чахчынан, Саха сиригэр 1912 култуурунай нэһилиэстиэ эбийиэгэ баарыттан Арассыыйа реестригэр 821 киирэн турар, диэн иһитиннэрэр Ил Дархан уонна Бырабыыталыстыба пресс-сулууспата.