Эһиил 80-ча хаарбах туруктаах дьиэ көтүрүллүөҕэ
2023 сылга киин куоракка 80-ча хаарбах туруктаах дьиэ көтүрүллүөҕэ диэн «Россия 24» телеханаал быһа эпииригэр куорат баһылыга Евгений Григорьев иһитиннэрдэ.
«Улахан үлэ оҥоһуллан, эһиил 79 дьиэттэн көһөрүөхпүт –Дьокуускайга улахан хабааннаах тэрээһин. Ити сыыппара эрэ буолбатах, ити – тыһыынчанан куорат олохтоохторун дьылҕалара», - диэтэ Евгений Григорьев.
Куорат баһылыга эппитинэн, хаарбах туруктаах дьиэттэн көһөрүү бырагырааматын чэрчитинэн, биэс сыл иһигэр биэс тыһыынча кэриҥэ киһи саҥа дьиэлэннэ.
Киин куорат дьаһалтата национальнай бырайыак чэрчитинэн 2025 сылга диэри оросчуоттаммыт «Гражданнары эргэ уонна хаарбах туруктаах дьиэ пуондатыттан көһөрүү» бырагырааманы 2023 сылга, болдьоҕун иннинэ, түмүктүүр былааннаах. Ити бырагыраамаҕа 2017 сыл тохсунньу 1 күнүгэр диэри сокуонунан хаарбах туруктааҕынан билиниллибит дьиэлэр киирэллэр.
Сонуннар
Ордук ааҕаллар
