Дыгын оонньууларыгар кимнээх кыттыахтарай?

Бэс ыйыгар Үс Хатыҥҥа буолуохтаах Туймаада Ыһыаҕын күүтүүлээх Дыгын оонньууларыгар кыттыыны ылар 12 уол аата билиннэ.
Сахалыы атах оонньуутугар, тутум эргииргэ, мас тардыһыытыгар, оҕунан ытыыга, 400 м сиргэ кыыһы эккирэтэн сүүрүүгэ, хапсаҕайга уонна ыарахан ыйааһыннаах сымара тааһы көтөҕөн ыраах илдьиигэ, дьэ, кимнээх илин-кэлин түсүһэр буоллулар? Кыһын-саас буолуталаабыт сүүмэрдиир күрэхтэһиилэр кыайыылааҕа Сунтаартан Тимофей Большаков, иккис-үһүс миэстэлэммит Петр Прудецкай (Дьааҥы), Борис Сдвижков (Амма), биэс иһигэр киирбит Николай Обоев (Ньурба), Давыд Колесов (Мэҥэ Хаҥалас), ону сэргэ эрдэтээҕи Дыгын оонньууларын кыайыылаахтара Алексей Уваровскай (Кэбээйи), Үөһээ Бүлүүттэн Айсен Ботуев уонна Владимир Шологонов, Вячеслав Дьяконов (Нам), Николай Матаннанов (Таатта), Дьулустаан Ноговицын (Горнай), Артем Варданян (Нам) бааллар. Бу ааттаммыт эр бэртэрэ бэс ыйын 25-26 күннэригэр Туймаада Ыһыаҕын түһүлгэтигэр күөн-күрэс былдьаһалларын көрүөхпүт! Дыгын оонньууларын биэс төгүллээх кыайыылааҕа Егор Филиппов эчэйии ылбытынан быйыл кыттыыны ылбат.