Дуобат тренерэ буолар былааннаах

ХИФУ устудьуона Александр Ефимов кыра эрдэҕиттэн дуобатынан үлүһүйэр, соторутааҕыта кини истибэт инбэлииттэр ортолоругар Европа чемпионатыгар кыайда.

Сашаны дуобакка эбэтэ Антонина Васильевна сыһыарбыт. Уолчаан кыра эрдэҕиттэн эбэтэ оонньуурун көрө сылдьыбыт, бастакы учууталынан эмиэ эбэтэ буолбут. Иллэҥ кэмнэрин наар дуобаттаан атаарар буолбуттар.

Начаалынай кылаастарга Иннокентий Ноевка, 2014 сыллаахтан тренер Петр Ушницкайга дьарыктанар. Тренерин уонна спортивнай психилогтар өйөбүллэринэн араас мэһэйи туораан, кэлин саҥарар дуобатчыттары кытта тэҥҥэ оонньуур таһымҥа тиийбит. Онтон уопутуран Арассыыйа уонна Европа чемпионаттарыгар кыттар буолбут.

Саша билигин Физическэй култуура уонна спорт институтугар үөрэнэр, инникитин истибэттэргэ дуобат тренерэ буолар баҕа санаалаах. Истибэт дьон дуобакка оонньууллара, үөрэтэр дьон суоҕуттан, сыл аайы аҕыйаан иһэрин этэр уонна бэйэтин чемпионнарын такайан таһаарар баҕа санаалааҕын үллэстэр.