Доруобуйаларыгар хааччахтаах оҕолорго үөрэнэр комплекс тутуллуоҕа

«Тутуу эһиилгиттэн саҕаланыаҕа. Комплекска 550 миэстэлээх оскуола,  200 миэстэлээх уһуйаан уонна 350 миэстэлээх интэринээт баар буолуохтара. Ити курдук, доруобуйаларыгар хааччахтаах оҕолор олорон эрэ үөрэнэллэригэр бары усулуобуйа тэриллиэҕэ», — диэтэ социальнай ситимнэргэ өрөспүүбүлүкэ Баһылыга.

Концессионнай сөбүлэҥи Саха сирин бырабыыталыстыбата уонна  «ПроШкола» ХЭТ түһэристилэр, сүрүн финансовай партнер – «Сбербанк» ПАУо.

Сэргэлээхтиир суолга 1982 сыллаахха тутуллубут 34-с №-дээх (коррекциялыыр) оскуола-интэринээт дьиэтэ эргэрэн 2021 сылга көтүрүллүбүтэ. Саҥа комплекс ити миэстэҕэ тутуллуоҕа. Тутуу 2023 сылтан саҕаланан 2024 сыл бүтэһигэр үлэҕэ киирэрэ былааннанар. Бырайыак олоххо киириитигэр 1,3 млрд солкуобай суумалаах федеральнай субсидия көрүлүннэ.

«ПроШкола» ХЭТ кытта 2024 сыл бүтүөр диэри уопсайа 3 685 миэстэлээх 10 саҥа оскуола тутуллуоҕа.