Доруобуйаларыгар хааччахтаах оҕолорго лааҕыр үлэлээтэ

Атырдьах ыйын 13 күнүгэр киин куоракка доруобуйаларыгар хааччахтаах оҕолору чэбдигирдэр лааҕыр симиэнэтэ түмүктэннэ.

Үөрүүлээх сабыллыы тэрээһинигэр куорат баһылыга Евгений Григорьев, Дьокуускай куорат Дууматын бэрэссэдээтэлин солбуйааччы Евдокия Евсикова уонна үөрэх управлениетын начаалынньыга Мария Петрова ыалдьыттаатылар.

Евгений Григорьев лааҕыры тэрийбит дьоҥҥо махтанна уонна маннык үлэ маассабай уонна мэлдьи ыытыллар буолуоҕа диэн бэлиэтээтэ.

Лааҕыр салайааччыта Ирина Соколова иһитиннэрбитинэн, манна атырдьах ыйын 7-13 күннэригэр 20 оҕо сынньаммыт. Икки этэрээт тэриллибит, хас биирдии этэрээккэ биирдии иитээччи, баһаатай уонна психолог үлэлээбит. Оҕолор психологы кытта дьарыктаммыттар, уруһуйдаабыттар, элбэх тэрээһиҥҥэ көхтөөхтүк кыттыбыттар.

Лааҕыр начаалынньыга кэпсээбитинэн, административнай куорпус, остолобуой уонна спорт балаһаакката өрөмүөннэммит. 

«Эһиил лааҕыр бэс ыйыттан саҕалаан үс симиэнэнэн үлэлиэҕэ. Оҕолор төрөппүттэрин кытта сынньаныахтара диэн былаанныыбыт», – диэтэ Ирина Соколова.

«Бу биһиги куораппытыгар бастакы холонон көрүү, онон сезон кылгатыллыбыт көрүҥүнэн ааста – биир нэдиэлэлээх буолла. Эһиил медиктэр сүбэлэринэн, төһө кыалларынан, сезону уһата сатыахпыт. Лааҕыр идэтийбит үлэһиттэринэн, педагогтарынан уонна медиктэринэн толору хааччыллыбыта. Сезон саҕаланыан иннинэ лааҕыр территориятыгар турар дьиэлэргэ өрөмүөн үлэтэ ыытыллыбыта, оҕолор чэбдик салгыҥҥа дьарыктаналларыгар диэн спорт балаһаакката өрөмүөннэммитэ. Биһиэхэ оҕо сайыҥҥы сынньалаҥын тэрийиигэ кыһалҕалар бааллара кистэл буолбатах: баҕалаахтарга барыларыгар миэстэ тиийбэт. Онон биһиги өйөбүлбүтүгэр наадыйар доруобуйаларыгар хааччахтаах оҕолорго (биһиги куораппытыгар 2 тыһыынчаттан тахса оҕо баар) уонна кинилэр төрөппүттэригэр бастакы уочарат кыһаллыахтаахпыт. Инникитин сайыҥҥы сынньалаҥҥа элбэх оҕо хабылларын туһугар лааҕыр материальнай-тэхиньиичэскэй баазатын бөҕөргөтөр үлэни салҕыахпыт. Оҕолор төрөппүттэригэр, Дьокуускай куорат үөрэҕириитин управлениетыгар, куорат Психолого-медико-социальнай арыаллааһын киинин салалтатыгар уонна үлэһиттэригэр оҕо сынньалаҥын тэрийбиккитигэр, тулуургут, үтүө сыһыаҥҥыт уонна сыралаах үлэҕит иһин махталбын тиэрдиэхпин баҕарабын» – диэн суруйда Евгений Григорьев бэйэтин телеграм ханаалыгар. 

Хаартыска: Олохтоох дьаһалта пресс-сулууспата