Дьонноох киһи тутайбат

Маҕан олохтоохторо анал байыаннай дьайыыга ыҥырыллыбыт дьон дьиэ кэргэттэригэр муус киллэрдилэр. Ол курдук, Сугун күөлгэ ыытыллыбыт субуотунньукка Маҕан орто оскуолатын үөрэнээччилэрэ, нэһилиэк дьаһалтатын үлэһиттэрэ кытыннылар. Куорат Дууматын дьокутаата Андрей Лебедев мууһу тиэйиигэ тырааныспарынан хааччыйарга күүс-көмө буолла.

Маҕан дьаһалтатын салайааччыта Сергей Спиридонов иһитиннэрбитинэн, нэһилиэккэ билиҥҥи туругунан анал байыаннай дьайыыга ыҥырыллыбыт дьонноох 16 ыал баар. Дьаһалта мобилизацияламмыт дьон дьиэ кэргэттэригэр улахан болҕомтону уурар, араас көмөнү оҥорор. Биирдиилээн тэрилтэлэр эмиэ туора турбаттар. Холобур, «Ледник» уонна «Кристалл» хааччахтаммыт эппиэтинэстээх тэрилтэлэр тустаах ыалларга ыраас ууну босхо тиэрдибиттэр.

“Нэһилиэкпитигэр аһымал кэнсиэри тэрийбиппит. Киирбит харчыттан дойду Бэрэсидьиэнэ Владимир Путин байыаннай сулууспалаахтар – анал байыаннай дьайыы кыттыылаахтарын ийэлэрин кытта көрсүһүүгэ баран кэлбит Марина Бахилинаҕа көмө оҥоһуллубута. Сорох харчыны мобилизацияламмыт дьон дьиэ кэргэттэригэр үллэрбиппит”, – диэн кэпсээтэ Сергей Спиридонов.  

Нэһилиэк олохтоохторо, элбэх ахсааннаах тэрилтэлэрэ, түмсүүлэрэ  анал байыаннай дьайыыга ыҥырыллыбыт дьон дьиэ кэргэттэригэр баардарынан-суохтарынан көмөлөһөллөр.